Ph.d.-mik illersuissaaq: Peter Fink-Jensen Saqqummersinneqarfia 16.09.2021
Uumassusileritooq Peter Fink-Jensen, Aalisakkanut Qalerualinnullu Immikkoortortaqarfimmeersuullunilu DTU Aqua-meersoq, Ph.d.-tut inaarumminik illersuissaaq tallimanngorneq 24. september nal. 10.00, Kalaallit Nunaanni qanoq ammassaqatigiiaat immikkooruteqartiginerat pillugu, qulequtaqartumik: ”Stock structure and connectivity of capelin (Mallotus villosus) in Greenland – Otolith microchemistry used to track past whereabouts of a small, pelagic fish” saqqummiussaqassalluni.
Ammassak (Mallotus villosus) issittup imartaani nalinginnaanerpaat ilagaat, aalisagarpassuarnut, timmissanut miluumasunullu uumasoqatigiinnerup iluani qitiulluinnartumik pingaaruteqarluni.
Ammassaat Kalaallit Nunaata kangerluiniittut (sinerissat qanittuaniittut) niuerutissatut tunisaanngillat. Atlantikup sinnerani ammassappassuit tunisaagaluartut, aalisakkanik aqutsiveqarfiit ammassaat aalisarneqarsinnaasutut ingerlatsivigissallugit ilisimasat annikippallaarneri uniffigisaramikku. Ammassaat sinerissap qanittuaniittut ammassaqatigiinnut ataatsinut immikkoortitertunulluunniit atanersut qangalili ilisimaneqanngilaq. Qanorlu ingerlaarfeqartarnerat aamma ilisimaneqarani.
Peter Fink-Jensenip ph.d.-nngorniutimisut Kalaallit Nunaanni ammassaat sinerissap qanittuaneersut qanoq ammassaqatigiiaartiginera misissuiffigisimavaa. Misissuinerlu sissiinik (otolitkemi) misissuinermigut aalisagaaqqat taakkua uumanerminni piffissani assigiinngitsuni sumiittarsimanersut paasisimavaa. Sissiit aalisakkat uumaneri tamakkerlugit alliartortarput, akuutissallu assigiinngitsut sissiinut akuliuttuartarlutik, taamaasilluni aalisakkat sumiissimanersut sissiinik misissuinikkut paasisaqartoqarsinnaasarluni. Taamaattumik aalisakkat sissii atorlugit paasineqarsinnaasarpoq aalisakkat avatangiisini assigiinngitsuniissimanersut.
Ammassaat sissii 619-it sumiiffinni assigiinngitsuni 19-ini, tassa Tunumi Kitaanilu pisarineqarsimasut misissuiffigineqarsimapput. Akuutissat kemiskiusut assigiinngitsut 14-it pinngoqqaataasarput. Misissuinerilli inernerisa takutippaat ammassaat sinerissami assigiinngitsuni pisarineqarsimasut sissiminni assigiinngitsunik pinngoqqaatimikkut akoqartut. Taamaasilluni paasinarsivoq immami assigiinngitsuni avatangiiseqarsimasut sumiiffinnilu assigiinngitsumiissimasut.
Peter Fink-Jensenip misissuinermini paasinarsisippaa Kalaallit Nunaata sineriaani assigiinngitsunik immikkoortunillu ammassaqatigiiaaqartoq, ammassaallu uumanertik tamakkerlugu sumiiffimmi aalajangersimasumiittartut, soorlu kangerloqarfimmi aalajangersimasumi. Paasisallu atorlugit sinerissap qanittuani ammassanniarnermik ingerlatsisoqassappat paasisat pingaaruteqarluinnarput, ammassaallu aalisarneqarpallaarnissaat pinngitsoorneqassappat ammassaqatigiiaat kangerlunnut ataasiakkaanut attuumassuteqartutut ingerlatsivigineqartariaqassapput.
Illersuineq pillugu
Ph.d.-mik illersuineq DTU Lyngby-mi pissaaq Zoom-link-ikkullu malinnaavigineqarsinnaajumaarluni: Ph.d.-forsvar – Peter Fink-Jensen Imal. Pinngortitaleriffiup Facebook-iatigut.
Naliliisussat
Siunnersortaapput
- Siunnersortaaneq: Seniorforsker Karin Hüssy, DTU Aqua
- Siunnersortaaqataasoq: Seniorforsker Teunis Jansen, DTU Aqua Pinngortitaleriffillu
Censorit
- Seniorforsker Martin Lindegren, DTU Aqua
- Lektor John A. Mohan, University of New England, USA
- Forsker Tomas Naeraa, Lund University, Sverige
Illersuinermi aqutsisuussaaq
- Sektionsleder aammalu seniorforsker Karen Edelvang, DTU Aqua
Itinerusumik paasisaqarniaraani attavissaavoq: Peter Fink-Jensen, oqarasuaat +45 25383990 imaluunniit e-mail: pefi@aqua.dtu.dk
Ph.d.-liarineqartup eqikkarnera ugguuna aasinnaavat (tuluttoorpoq)
Ph.d.-liaq uunga attaviginninnertigut piumaneqarsinnaavoq: Karin Stubgaard, stub@aqua.dtu.dk
Ph.d.-mik illersuineq pillugu DTU-p nittartagaani atuarsinnaavutit: Ph.d.-forsvar om bestandsstruktur hos lodde i Grønland
