Pikialasorsuaq killiffissiorneqalerpoq Saqqummersinneqarfia 23.11.2017
Ataatsimiinneq “North Water Polynya Conference” Københavnimi ullumimiit 22. november 2017 aallartittoq 24. november 2017 tungaanut ingerlanneqassaaq. Tamatumani peqataasut 80-it missaanniittut, amerlanerusut ilisimatusartartut Kalaallit Nunaanniit, Danmarkimiit Canadameersullu Smith Sundip Kalaallit Nunaatalu avannaarsuata akornanniittup imartap, Pikialasorsuup, killiffia pillugu ilisimatusarnernik nutaajunerpaanik saqqummiussisaqattaassapput oqallillutillu. Ilisimatusarnermi inernerit kingulliit saqqummiussorneqassapput siunissamilu ilisimatusarnikkut suliassat aalajangersarneqassallutik aamma. Avanersuarmi piniartut sinniisaat kiisalu nunat peqataatitaqartut pisortani aqutsinikkut suliaqartitaasa sinniisaat aamma oqalliseqataallutillu ilisimatusarnikkut anguniagassanik aliangersaaqataassapput.
Pikialasorsuaq uumassuseqarnermut aammalu Avanersuarmi uumassuseqarnerup ataqatigiiffiinut imaannanngitsumik sunniuteqartarpoq. Nunatta imartaanniittut ammalatarsuit taama ittut ikittuaraannaasut mianerineqartussatut toqqarneqarsimapput, taamaalillutillu imartat taama ittut immikkut isigalugit eriagineqarlutillu alaatsinaanneqartussatut aalajangersaavigineqarsimasuupput.
Ataatsimiinnermi pingaartumik silap pissusiata allanngornerata kinguneri qitiutinneqassapput. Ukiup sikua aalaakkaasoq tutsuiginartorlu naatsorsuutissaajuaannarunnaarpoq, sikuunikinnerusalerpoq piffissamilu sivikinnerusumi sikuusarnera aammattaaq Pikialasorsuarmi akulikinnerujartortumik pisalerpoq. Pikialasorsuup uumassuseqarnermut atuuffia allannguuteqassappat, tamanna uumassuseqarnermut qanoq sunniuteqassava? Tassa apeqqutit taama ittut ulluni aggersuni itisilertarlugit qaqilerneqarlutillu oqallisigineqassaput.
Ataatsimiinnermi qulequttat qitiutitat makkuupput:
- Silap pissusiata ukiuni 4000-ini kingullerni allanngoriartorsimanera
- Imartat pissusaat, imaq/sikusarneralu aammalu Pikialasorsuup ammalatatut isigalugu atasinnaassusia
- Immap uumassusilinnik isumalluutinnik pilersuisuunera uumasullu nerisareqatigiiittarnerisa ataqatigiinnerat pillugit misissuinerit
- Imaani miluumasunik uumasoqatigiiaat, timmissat, aalisakkat pisuussutinillu uumassusilinnik maannakkut iluaquteqarnerup nalilersoneqarnera periarfissallu nutaat
- Avatangiisinik mingutsitsissutit, aallaavii, sunniutaat aammalu tamakkununnga tunngatillugu qanoq ineriartortoqarnera
- Umiarsuit angallannerat, aatsitassarsiorneq kiisalu uuliasiorneq gassisiornerillu.
Ataatsimiinneq Pingortitaleriffimmeersunit aammalu Aarhusip Universitetianeersunit aaqqissorneqarpoq. Ataatsimiinnerup inerneratut kingusinnerusukkut killiffik nikeriaqqiffiusinaasullu pillugit Pikialasorsuarmut tunngatitamik nalunaarusiamik saqqummiussisoqassaaq. Nalunaarusiaq pisortani aqutsinermik suliaqartut suliassanik pilersaarusiortarnerminnut kiisalu silap pissusiata allannguutaanut naleqqussarniarnermi atugassaattut eqqarsaatigineqarluni suliarineqassaaq.
Pikialasorsuaq pillugu nassuiaat qallunaatuuinnarallartoq uani atuarneqarsinnaavoq – kalaallisoortaa piareerpat ikkunneqassaaq:Link
Ataatsimiinneq pillugu paasisaqarnerorusukkaanni nittartagaq iserfigiuk: conferences.au.dk/now/.
Itinerusumik paasisaqarusunnermi saaffigisassat:
Aarhus Universitetiani immikkoortortami Arctic Research Centerimi Ilisimatusarnernut siunnersuinernullu pisortaq, Anders Mosbech oqarasuaat (tlf. +45 29440203 imal. e-mail: amo@.bios.au.dk).
Pinngortitaleriffimmi Professori, Mads Peter Heide-Jørgensen oqarasuaat (+45 40257943 imal. e‑mail mahe@natur.gl).
