Nannut Qeqertarsuup kitaani misissuiffigineqalersut Saqqummersinneqarfia 16.03.2009
Pinngortitaleriffiup april 2009-mi nannut Qeqertarsuup kitaani sikuni ingerlaartuniittut ilisimajunnaarteriarlugit nalunaaqutsersorniarpai. Nannut helikopterimit ilisimajunnaartinneqassapput raatiukkullu aallakaatitsissutilersorneqarlutik. Taakku atorlugit paasineqassaaq nannut qanoq ingerlaartarnersut.
Selskabit nunanit allaneersut Qeqertarsuup kitaa uuliasiorfigerusuppaat. Tamannali upernaakkut nanoqarfiusarpoq. Nannut Baffin Bugtenimit nanoqatigiinneersut upernaakkut Kitaata sineriaani sikut ingerlaartut sinaanniittarput neriniarlutik.
Nannut satellitsikkut malinnaaffiginerisigut Pinngortitaleriffiup paasisaqarfigissavaa qanoq uuliasiorfissaniitsigisarnersut. Aatsitassarsiornerup pinngortitamut uumasunullu qanoq sunniisinnaatigineranik naliliinissamut misissuinerit tunuliaqutaasussaapput.
Pinngortitaleriffiup Niaqornani illuutaa aallaavigalugu biologit Pinngortitaleriffimmeersut aamma Universitetet i Oslomeersut AirGreenlandip helikopteriutaanik Baffin Bugtenimi sikut ingerlaartut qulaavaassavaat nannunik ujarlerlutik.
Nannut ilisimajunnaarteriarlugit raatiukkut aallakaatitsissuserneqassapput satellitsikkut sumiinnersut malinnaavigineqarsinnaalersillugit. Arnavissat inersimasut 8-t raatiukkut aallakaatitsisuserneqassapput, angutivissat 10-t nannullu minnerit immikkut tamarmik siutimikkut raatiuaralerneqassallutik. Nannut tamarmik siutimikkut nalunaaqutserneqassapput, sigguisalu iluatigut normumik kakiorneqarlutik. Taamatut ilisarineqarsinnaanngussapput Kalaallit Nunaanni Canadamiluunniit pisarineqassagaluarpata. Nannut Kalaallit Nunaanni nalunaaqutsikkat normup siuani ”D”-taqarput, Canadamili nalunaaqutsikkat ”X”-taqarlutik.
Nannut aprilimi ilisimatuunit nalunaaqutseriikkat marloriarlutik pisareq-qinnginnissaat siunertaralugu nulumikkut normumik angisuumik titarsiffigineqassapput.
Ilisimajunnaarsaat nannup timaanit itereernerata kinguninngua peeruttarpoq. Taamaattorli nanoq nalunaaqutserneqarsimasoq pisarigaanni ullut 45-t kingorna nerinnginnissaa innersuussutigineqarpoq. Nanoq nalunaaqutsigaq pisarineqarpat Pinngortitaleriffik erngersumik saaffigineqartariaqarpoq paasiniarlugu qanga nalunaaqutsigaasimanersoq.
Maleruagassat atuuttut malillugit nalunaaquttat tamarmik aammalu nannunit nalunaaqutsikkanit paasissutissat nammineq kommunerisamut tunniunneqartassapput. Misissuineq ingerlanneqassaaq Pinngortitaleriffiup, Danmarks Miljøundersøgelser, Universitetet i Oslo, Aatsitassarsiornermullu Pisortaqarfiup Niaqornanilu piniartut suleqatigiinnerisigut.
Paasissutissat allat: Misissuisuuneq Erik W. Born, Pinngortitaleriffik, E-mail ewb@ghsdk.dk imaluunniit immikkoortortami Pisortaq Fernando Ugarte, Pinngortitaleriffik, Tlf: +299 361200, E-mail E-mail feug@natur.gl
