Silap Pissusianik Ilisimatusarfik Daneborgimi nutaanik ilisimatusarfeqalissasoq Saqqummersinneqarfia 01.03.2010

Zackenbergimi ilisimatuutut misissuiffik Aage V. Jensens Fondenik fem mio. kruuninik aningaasaliiffigineqarsimavoq illumik ilisimatusarfimmik 154 kvm-isut angitigisumik Daneborgimi sananeqartussamut atugassanik. Daneborg Zackenbergip kujataata-tungaaniippoq 25 kilometerinik ungasitsigaluni. Sananeqarnera aasaru aallartissaaq ukiorlu 2011 atorneqalissalluni.

Illu ilisimatusarfittaassaq nutaaq ilaatigut Silap Pissusianik Ilisimatusarfimmit nammineq ilisimatuuanik MarinBasis Zackenberg aamma atorneqartassaaq. Illup nutaap Daneborgimi silasiorfitoqqap illuutai taarsissavai. Silasiorfitoqaq 1994-imiilli ilisimatuunit suliffittut angerlarsimaffittullu atorneqarpoq, taamani Søren Rysgaardip Young Sundimi immami ilisimatusarneq allartimmagu.

Illu ilisimatusarfissaq inunnik qulinik najugarineqarsinnaasoq aamma misissuiveqassaaq laboratorianik toqqorsivittaqassallunilu. Misissuiffik Zackenberg Daneborgimi umiatsiaasiveqarpoq 144 kvm-isut angitigisoq, taannalu aamma atortuusiviutigivoq.

Daneborgimi silasiorfitoqaq ilisimatusarfissanik nutaarluinnarnik 154 kvm-isut annertutigisunik ukioq 2011 taarserneqassaaq. Ass.: Søren Rysgaard.