Siunnersuinermi 904 tusind tonsinngortitsineq ammassaqatigiit ukioqatigiiaat amerlanerannik patsiseqarpoq Saqqummersinneqarfia 06.10.2021
Tunumi ammassaqaqaaq. Ammassaqarnerujussuatalu kingunerisaanik 2021/22-mi Islandip eqqaani 904.200 tonsinik pisaqartoqarnissaanik siunnersuisoqarpoq. Ammassaaraqarluarmallu 2023-mittaaq ammassanniartoqarluarsinnaanissaanut periarfissaqarluassangatinneqarpoq.
Ammassaat suffisinnaasut ukiorpassuanngulersuni aatsaat taamak amerlatigaat, ammassaallu ukiunik ataatsimik marlunnillu pisoqassusillit 1995-imiilli amerlanerpaasarsimasut pingajuattut amerlasuseqarput. Taamaattoqarneratalu 2023-p aallartinnerani ammassanniartoqarluarsinnaanissaanik neriunartoqartitsivoq. Island-ip, Kalaallit Nunaata Norgellu akornganni aalisarnermut isumaqatigiissusiortoqarneratigut nunarput pisassiissutaasut 15%-iinik pisassiiffigineqarpoq, nunatsinniillu 2021/22-mi pisarineqartussat tonsinngorlugit 136.000 tonsinik amerlassuseqartussaapput. Islandip imartaani ammassanniartoqartarpoq oktobarip 15-ianiit apriilip 15-iata tungaanut.
Ammassaat avataaniittartut Tunup imartaaniinnerusarput, Islandilli kujammut kitaatungaani suffisarlutik. Ammassanngortussat suli ammassassaaraatillutik Tunumi alliartorfigisartakkaminnut sarfaattitittarput, tamaanilu imaani uumasuaqqanik saattuaaraaqqanillu nerisaqartarput; namminnerlu arfernik, puisinik, aalisakkaniillu anginernik nerineqartaqaat. Ammassaat 2 ½ missaannik pisoqassuseqaleraangamik Islandimut utertarput sufferiarlutillu toqusarlutik.
Ammassaqatigiiaat 2003-p missaani kimmut illuarsimapput annerusumillu Tunup imartaaniinnerulersimallutik – immap kissarnerulingaarnera pissutigerpasillugu ammassaat Tunup imartaaniinnerulersimapput. Tamatumunngalu ilutigitillugu ammassaqatigiit ikileriaateqarujussuaqqaarsimapput, 2005-imiillu pisarineqartartut tamakkerlutik 350.000 tonsiinnanngorsimallutik. Ukiariartornerani misissuinerit paasinarsisippaat ammassaat suli kitaanut siaruaassimanerusut (Takutitassiaq 2), ammassaqatigiiaalli ukioqatigiiaat amerlanerisa ammassaqatigiiaat amerlisilluinnarsimavaat.
Ekkolodi atorlugu peqassutsimik misissuinerit siunnersuinermut atorneqartut Pinngortitaleriffiup Islandimilu Marine and Freshwater Research Institute-p suleqatigiillutik suliarisimavaat. Nalunaarusiaq aaneqarsinnaavoq uani.
Aalisakkat immap ikeraniittartunut allanut 2022-mut siunnersuinerit 2021-mut naleqqiulugit appariaateqarsimapput: avaleraasartuut; (-7%), ammassassuit (-8%), saarullernat (-19%). Siunnersuinerup eqikkagaasumik allannera takuuk uani.
Itinerusumik paasisaqarniaraanni attavigineqarsinnaavoq:
Seniorforsker Teunis Jansen, Aalisakkanut Qalerualinnullu Immikkoortortaqarfik tlf. +45 21314997 imaluunniit mail teja@natur.gl-imut attavigineqarsinnaavoq.
Nunani tamalaani pisat tusindtilikkaanik tonsinngorlugit (saamerleq) ukiaanerani misissuinermi ammassaat marlunnik ukiullit takuneqarsimasut (talerperleq).
