Qaleralinniarnerup aqunneqarnerata allanngortinneqarnissaata aningaasatigut, inuiaqatigiinni, piorsarsimassutsikkullu kingunerisinnaasai Saqqummersinneqarfia 14.02.2012

SPI-mi, Aalborg Universitetimi aamma DTU management-imi ilisimatuut, Upernaviup pigisaani qanittumi aalisarnerup aqunneqarnerata allanngortinneqarnissaata kingunerisinnaasai pillugit misissuisimapput.

Aalisarnerup aqunneqarnerata allanngortinneqarnissaa ukioq manna aallartisarneqarniartoq pisassarititaasut ataasiakkaanut tunniuttalernissaannik, aalisartullu nutaat mattunneqarnissaannik kinguneqarsinnaavoq. Anguniagaq tassaavoq ikinnerusunik annerusunilli aalisariuteqalernissaq, aalisarnerup aningaasatigut ingerlalluarnerulernissaa tikitsaaliorniarlugu, biologillu siunnersuutaasa malinneqarnissaat isumannaarniarlugu.

Misissuinerup uuma takutinniarpaa, angallatit minnerusut amerlanerusulli atorlugit aalisartarnerup maannakkut atugaasup, kiisalu umiatsiaaqqaniit qimussiniillu qaleralinnik pisanik, ikinnerumaanik tunisaqartarnerup iluaqutissartai isiginiarneqanngippallaartut. Tamakkumi Upernaviup pigisaani aningaasaqarnikkut, aalisartullu ataasiakkaat inuuniarnerannut pingaaruteqaraluarmata.

Qaleralinnik tunisaqartarnerup allatut pinialuttarneq aamma iluaqusertarpaa, inuiaqatigiinnilu taakkunani pisanik paarlaasseqatigiittarneq avitseqatigiittarnerlu piuartillugu. Tamakku tamarmik aningaasaqarnikkut, piorsarsimassutsikkut, inuiaqatigiinnilu inooqataanikkut pingaaruteqartutut misissuisuniit nalilerneqarput.

Aalisartut ikilisarneqassappata ajornartorsiutinik allanik takkuttoqartussaavoq. Soorlu aalisarsinnaajunnaartut siunissami suliffissaqassanersut, imminnullu allatigut pilersorniarnissaat eqqumaffiginiarneqartariaqalissaaq. Taamaattumik aalisarnerup aqunneqarnerata allanngortinnissaa inunnut Upernaviup pigisaaniittunut, kiisalu nunatta aningaasaqarniarneranut naatsorsuutiginngisanik pitsaanngitsunik kinguneqaratarsinnaavoq. Misissuineq uani pdf-inngorlugu atuarneqarsinnaavoq:

A study undertaken under the Greenland Climate Research Centre by
Alyne E. Delaney*
Rikke Becker Jakobsen
Aalborg University (AAU)
Kåre Hendriksen
Danish Technological University (DTU-MAN)
Innovative Fisheries Management, IFM
– an Aalborg University Research Centre