Lagenorhynchus alberostris

Isikkua nerisaalu

Aarluarsuit qaqortumik siggullit (matuma kingorna aarluarsuit) angisuujupput 210 – 240 cm-inik angissuseqalersartut aammalu 180 – 350 kg-nik oqimaassuseqalersarlutik. Angutivissat nalinginnaasumik arnavissanit anginerusarput. Aarluarsuit sukkasuujupput nukittuujullutillu aamma aalisakkanik inuussuteqarput. Aarluarsuit nalinginnaasumik qatigamikkut qaqortortaqartarput qaqornersarlu taanna naparutaata tunuaniittoq issiaattamut eqqaanarsinnaavoq aamma saneqqamikkut naamikkullu qasertortaqartarput/qaqortortaqartarput. Aarluarsoqatigiit taakku taaguutaat sigguannit naatsuneersuuvoq taannalu nalinginnaasumik qaqortuusarpoq.

Siammarsimanerat

Aarluarsuit nunarsuup avannarpasinnerusortaani Norgep imartaanit Canadap imartaanut uumasuupput (avannarpasissutsit 40°-70°). Aarluarsuit tamarmiullutik 100.000-iunissaat ilimagineqarpoq. Kalaallit Nunaata imartaa 12.000-it missaanni aarluarsoqarpoq tamakkulu Kujataata imartaanit Qeqertarsuup Tunuata imartaa tikillugu naammattuugassaapput, nalinginnaasumik aarluarsuit tallimat missaanniillutik ataatsimoortarput. Nunavissuit aariaasa nalaanni 50 – 200 meterisut ititigisuniikkajuttarput.

Killiffik aqutsinerlu

Aarluarsuit iluamik piniagaanngillat aamma ukiumut 30-t missaanniittunik aarluarsuttoqartarpoq aamma aalluarsoqatigiit tamakku aqutsivigineqanngillat.

Ilisimatusarneq

Arfernik kisitsinernut niisarnat ilaatinneqartarnerisa saniatigut Kalaallit Nunaata imartaani aarluarsuit ilisimatusarfigineqanngillat. Islandip imartaani aarluarsoqatigiinnik ilisimatusartoqangaatsiarpoq.