Tusarluarneq: Suliamut aningaasaliiffigitinneq Saqqummersinneqarfia 24.11.2023

Kalaallit Nunaani immap naqqata uumassuseqarnerata nakkutiginissaanut suliamut aningaasaliineq

Silap Pissusianik ilisimatusarfik aamma Pinngortitaleriffik immap naqqani uumassuseqatigiinnerup nakkutiginissaanut 17,2 millioner kr.-inik Kalaallit Nunaata EU-llu akornanni suleqatigiinnissamik isumaqatigiissummit taperneqarpoq.

Immap naqqata assiliortorneqarnissaanut kiisalu uumasoqatigiit immap naqqaniittut nakkutiginissaannut, suliniut sukumiinerusoq ukiuni sisamani ingerlanneqassaaq.

Uumassuseqassutsip assigiinngisitaartuunerata qanorlu atuuffeqarnera ilisimasaqarfigileraanni, pinngortitap piujuartinnissaanut pitsaanerusumik siunnersuisoqalersinnaanera anguneqassaaq.

Suliniummik aqutsisoq, ilisimatusartoq Nadescha Zwerschke nuannaarluni ima oqarpoq:

”Aningaasaliinerup kingunerissavaa, immap naqqani piffiit misissorneqarsimanngitsut sannaasa uumassuseqassusaasalu ilisimatusarfigilernissaat.  Taamaalillutalu Kalaallit Nunaani, immap naqqani piffiit immikkut pingaassusillit erseqqinnerusumik paasisaqarfigissavagut.”

Suliniutip ukiuni sisamani ingerlasussap, immap naqqa annerusumik assiliornissaanut nakkutigineqarnerulersinnaaneranillu siunertaqarpoq. Immap naqqata pinngortitaassusaa aningaasaqarnermut ilaalluinnarpoq, ilisimanngisagulli amerlapput. Kalaallit Nunaata sineriaa ilisimatusarfigineqanngitsunik kangerluppassuaqarpoq, immallu naqqata toqqaviani uumassuseqatigiit ataqatigiiffii assigiinngisitaartuupput, ilaatigut koraleqarfiullutik marulloqarfiullutilluunniit. Immap itisoortaa nalunartuuvoq. Ilisimaleriigamininnguattali takutippaat,

immami itissutsini assigiinngitsuni uumasoqatigiit raajaqassusermut qaleraleqassusermullu isumalerujussuusut. Aammali immap naqqani piffiit attorneqanngitsut, silap pissusaata allanngorneranik annikillisitsisarput tassa, CO2-mik aniatitat imaanut pisut uninngatittaramikkit. Immalli naqqi kilisannernut, aatsitassanik piiaanernut, issittumilu silap allanngorneranut malussajasuupput. Pitsaasumik eqaatsumillu imminullu napatittumik nunap pisuussutaanik aqutsiniaraanni, uumassusillit assigiinngisitaarnerat taakkualu atuuffiisa paasisaqarfiginerunissaat pisariaqarpoq.

Aningaasaliiffigineqarnitta imartatsinni uumassusillit paasilluarnerunissaannut periarfississavaatigut, suliniutillu pingaarutillip suleqatigiiffigilersinnaanera qujamasuutigaarput. Kalaallit nunaata immata naqqa erlinnartuusivigaarput. Immalli naqqa qaammammilluunniit ilisimasaqarfiginnginneruarput. Immami uumassusillit avatangiisaat pissusaallu paasiniaaffigissavagut, Silap Pissusianik ilisimatusarfiup pisortaa Mie Winding oqarpoq.