Fransket pulaartut Saqqummersinneqarfia 08.03.2023

Kangillinnguit atuarfianni atuartut Frankrigimi atuaqatigiinnit tikeraarneqaqqammerput. Atuartut nunatsinnut tikeraarnerat suliniut Erasmus, Eumit aningaasalersorneqartoq aqqutigalugu piviusunngortinneqarpoq. Kangillinnguit Atuarfianneersut aamma Erasmusimut ilaasortaagamik.

Taamaasilluni atuaqatigiit tamarmiusut ilinniartitsisuilu Auton’imeersut, Frankrigip kangiatungaaneersut – sapaatip akunnera Nuummiipput, atuaqatigiillu taakkua Frankrigimeersut Nunatsinneersullu Pinngortitaleriffik pulaarpaat.

”Nunarput imaannaanngitsoq tikeraartittinnut assut takutikkusupparput”, ilinniartitsisoq nunatsinneersoq Sofie Frederiksen, pulaarnissamut piareersaalluni saaffiginninnermini allappoq.

Atuartut fransket namminneq oqaatsitik atorlugit silap allanngoriartornera pillugu saqqummiussiffigineqarput suleqatitsinnit Caroline Bouchardtimit Canadami franskisut oqaluffiusumeersumit.

Atuartut ilinniartitsisullu katillugit 50inik amerlassusillit kalaallisut, qallunaatut, tuluttut franskisullu saqqummiussiffigineqarput.

Atuartut pulaarneranni assit Christian Klindt Sølbeck’imik assilisaapput.