Saattuat sannaannut kiassuseq qanoq pingaaruteqartiginersoq misissorneqarpoq Saqqummersinneqarfia 07.07.2009

Immap iluani misissuutit marluk tassaasut Sea-bird SBE 37SMP MicroCat Sisimiut eqqaanni kangerlunni Itillip Ikertuullu naqqannut Pinngortitaleriffimmit ikkunneqassapput. Taakkua immap kissassusianik, qanoq tarajuutigineranik kangerluullu naqqani immap naqitsineranik minutsit qulikkaarlugit uuttuinernik eqqorluinnartunik katersuisussaapput. Biologit siunissami ilaatigut takusinnaassavaat immap kissassusaa saattuat qaqugukkut suffisinnaanngorneranut sunniuteqartarnersoq.

Uuttuutit kangerlunnut pineqartunut julip ingerlanerani ivertinneqassapput. Atortorissaarutit uuttuissutit siammut manngertornineq ajortumut ikkunneqassapput. Ukiut tamaasa piffinni saattuanik misissuinermut atatillugu uuttuutit qaqinneqartassapput, paasissutissartai tiguneqartassallutik kingornatigullu iverteqqinneqartassallutik.

– Uuttortaanerit siunertaraat immap kissassusiata qaqugukkut saattuat kinguaassiorsinnaalertarnerannut sunniutaanik misissuinissaq, biologi AnnDorte Burmeister oqaluttuarpoq.

– Neriuppugut paasiumaarlugu immap kissarnera imaluunniit saattuat nerisaat saattuat qanoq angitigilerlutik kinguaassiorsinnaalersarnerannut peqqutaanersut. Kangerluk Itilleq assigiinngisitaartorujussuarmik immamik immap qaavaniittumit pulaavigineqartuuvoq, Ikertoorli sinerissami immap naqqata imartaanit pulaararfiuvoq. Misissorusupparputtaaq ukiumiit ukiumut ukiup qanoq ilinerani immap kissarnerata, tarajoqassusiata immallu naqqanut naqitsinerup kangerlunni allanngorarnera, AnnDorte Burmeister nangippoq.

Kangerluit qinnguini immap iluani kissassutsimut, tarajoqassutsimut naqitsinermullu paasissutissat Pinngortitaleriffimmit piffissaq ungasinnerusoq isigalugu, soorlu klimap aalisagaqarneranut qalerualeqarneranullu sunniutaanut misissueqqissaarnernut atorneqarsinnaassapput.

Pinngortitaleriffiup uuttuutit Sea-bird SBE 37SMP MicroCats ukiuni arlalinni iluatsittumik Nuup kangerluani Tunup Avannaanilu Young Sund-imi atorsimavai.