Arferit kimmut siku illikaqatigaat Saqqummersinneqarfia 19.07.2010
Assimi: 23. februar 2010 satellitsikkut assilisamit ukioq manna qanoq Kitaa sikukitsigisoq takuneqarsinnaavoq.
Piniartut qilalukkanik qaqortanik qernertanillu arfivinnillu nassaassaqannginnertik maalaarutigaat tamatumunngalu pissutaavoq, Kitaani ukioq manna pisarnermit sikoqannginnerunera. Aalajangersimasumik periuseqarluni ukiuni 17-ni kisitsinerit takutippaat, arferit sikup kinguariarnera kimmut malikkaat, taamaammallu piniartut ukiormanna uumasunik nassaassaqanngilaat.
Polar Research-imi allaaserisami nutaami biologit Pinngortitaleriffimmeersut nassuiaatigaat qanoq qilalukkat qaqortat ukiisarfii sikunit sunnerneqartarnersut. Qilalukkat Kitaani ukiisarfiat aalajangersimasumik periuseqarluni timmisartumik 1981-ip 2008-llu akornanni quleriarluni kisitsiffigineqarpoq.
Timmisartukkut kisitsinerit taakku arferit ikkannersuit suatungaaniinnerinik paasissutissiipput. Arferit sumiiffii ikkannerillu sikoqassusaat sanilliukkaanni paasinarsivoq, arferit ukiuni sikoqarluarfiusuni, nunap qanittuani imarnersaniittartut. Ukiuni sikoqarpianngitsuni arferit kimmut illuartarput ikkannersuillu qeqqiniittarlutik ilaatigullu ikkannersuit kimmut killinginiissinnaasarlutik.
Tamanna Kitaani ukiukkut qaqortanik qilalugartarineqartartut naatsorsornerannut sanilliukkaanni, ersarippoq ukiut sikoqarluarfiusut pisaqamalluarnarnerpaajusut. Tassa ukiuni arferit nunamut qaninneruffigisaanni piniartut angumasinnaasaanni. Tamatuma aamma nassuiarpaa Kitaani ukiuni kingullerni qaqortanik qilalugartat kinguariarsimanerat. Tassa sikoqarpiarsimanngimmat. Pisat kinguariarsimanerat qilalugaqatigiit qaqortat siuariaatigisimavaat uumasoqatigiillu annikitsumik siuariarsimapput maannalu arferit 10.500 missaanniilersimallutik.
Ukiormanna Kitaa pisarnermit sikoqannginneroqaaq (satellitsimit assilisaq 23 februar 2010-meersoq takuuk) piniartunillu arlalinnit maalaarutigineqarpoq qilalukkanik qaqortanik qernertanillu nassaassaqannginnera. Timmisartumit piffissap ingerlanerani kisitsinernit paasisanit nutaanit maanna nalunngilarput ukiuni Kitaani sikoqarfiorpianngitsuni arferit kimmut siku malittaraat piniartunillu nassaarineqarsinnaannginnerannut tamanna nassuiaataavoq.
Qilalukkat qaqortat Kitaata sikuata eqqaani. Ass.: Mads Peter Heide-Jørgensen, GN
