Silap Pissusianik Ilisimatusarfimmi suliassaqarluarput Saqqummersinneqarfia 23.11.2010

Ilisimatuut 75-it teknikerillu arfineq-pingasut nunanit assigiinngitsuneersut Silap Pissusianik Ilisimatusarfimmi ulluni pingasuni ukiumoortumik ataatsimeeqqammerput. Ukiumi siullermi suliniuteqarnernit angusarpassuit saqqummiunneqarput, soorluttaaq ukiuni aggersuni suliassat immikkuualuttukkuutaarlugit ataqatigiissaarneqartut. Ilisimatuussutsikkut saqqummersitassat, atuakkat nuannarineqartut, aviisinut ilanngutassiat (saqqummersitat takukkit) il.il. suliarineqareerput aamma allarpassuit takkuttussaapput. Ataatsimiinnermi siunertaq pingaartoq tassaavoq ilisimatusartut assigiinngitsunik suliallit naapeqatigiinnissaat suliaminnillu tusarfigeqatigiinnissaat siunissamilu suliassanik assigiinngitsunik suliaqarnissamut pilersaarusiornissaq.

Ilisimatusartut suliaat tamarmiusut ukiut arlaqanngitsut qaangiuppata apeqqutinut pingaarutilinnut makkununnga akissutaassapput: Sermersuup aakkiartornera sumit aqunneqarpa? Issittumi pinngortitap ataqatigiinnera qanoq allanngoriartorpa? Silap allanngoriartornera Issittumi inuit inuuniarnerannut qanoq sunniuteqarpa?

Ukiup naalernerani ilisimatusaatinut nutaanut aningaasatigut tapiissutit Silap Pissusianik Ilisimatusarfimmit agguaanneqassapput pilersaarusiallu katillugit 25-t tapiiffigineqassapput. Tamatuma saniatigut Silap Pissusianik Ilisimatusarfimmi Canadami University of Manitoba-mik aamma ArcticNet-imik kiisalu Nunani Avannarlerni ilisimatusarnikkut suliniuteqarfimmik DEFROST-imik qanimut suleqateqartoqalersimavoq. Suleqatigiinnermi tassani Silap Pissusianik Ilisimatusarfimmi Canadamiut Europamiullu Issittumik immikkut ilisimasaannik akuleriiaarinissamut ineriartortitsinissamullu pitsaalluinnartunik periarfissaqarpoq.

Silap Pissusianik Ilisimatusarfik professor, Søren Rysgaardimit aamma Silap Pissusianik Ilisimatusarfimmi pisortap tullianit, professor Torben Røjle Christensenimit aqunneqarpoq. Tamatuma saniatigut Søren Rysgaard Canadami Uumasuaqqanik tappiorannartunik Silallu allanngoriartorneranik University of Manitoba-mi ilisimatusarnermut pisortanngortinneqarsimavoq. Torben Røjle Christensen Sverigemi Lunds Universitet-imi professoriuvoq DEFROST-imillu pilersaarusiami ataqatigiissaarisuulluni.

Silap Pissusianik Ilisimatusarfik Nuummi Pinngortitaleriffimmiippoq tassanilu ulluni makkunani illu nutaarluinnaq atorneqalerpoq, illu Aage V. Jensenip Aningaasaateqarfianit aningaasaliiffigineqarsimavoq.