*Required
*Required
*Required
*Required
*Required
*Required
*Required
*Required
Send
Thank you for your application!
 

Nannut Kitaatalu Avannaani piniartut ilisimasaat pillugit atuagaq nutaaq

Kitaata Avannaani nannunniartarneq pillugu Pinngortitaleriffimmit apersuinernit angusat maannakkut tuluttut saqqummersinneqarsimalerput. Angusat siusinnerusukkut kalaallisut qallunaatullu saqqummersinneqarsimapput kisiannili Canadami Alaskamilu aamma Issuttumi sumiiffinni allani kalaallit nannunniartarnerannik soqutiginninneq annertuallaaqimmat atuagaq maannakkut tuluttut saqqummersinneqarpoq.

2006-imi Kitaata Avannaani nannunniartartunik 72-inik misilittagartuunik apersuinerit tunngavigalugit atuakkiortoqarpoq atuakkamilu nannunniartartut 1952-miit 2005-ip tungaanut 588-eriarlutik nannunniartarsimaneranni pisartut sukumiisumik allaaserineqarput. Piniarnernernit kisitsisit Kitaata Avannaani nannuttarineqartartut 1990-kkunniilli amerliartulersimanerannik ilimanaateqartitsimmata misissuineq aallartinneqarpoq. Allannguut tamanna silap pissusiata allanngorujussuarnera ilutigalugu aamma Kitaata Avannaata sikoqannginnerulernera pissutigalugu pivoq. Nannunnianit paasissutissat nannunniartarneq, nannut oqaluttuassartaat, silap allanngornera tamakkulu nannunut nannunniartarnernullu sunniutaat sukumiisorujussuarmik allaaserineqarnissaannut tunngavissiisuupput.

Pinngortitaleriffimmi ICC aamma Namminersorlutik Oqartussani Aalisarnermut, Piniarnermut Nunalerinermullu Naalakkersuisoqarfik suleqatigalugu misissuisoqarpoq.

Atuakkiortut tassaapput Erik W. Born (Pinngortitaleriffimmi ilisimatusartoq angajulleq, Nuuk), Anna Heilmann (Pinngortitaleriffiup avataani Pinngortitaleriffimmut siunnersorti, Nuuk), Lene Kielsen Holm (Inuit Issittormiut Siunnersuisoqatigiivini (ICC) Nunanut tamalaanut immikkoortortaqarfimmi pisortaq, Nuuk) aamma Kristin L. Laidre (Pinngortitaleriffimmi ilisimatusartoq).

Nannut Kitaatalu Avannaani piniartut ilisimasaat pillugit atuagaq nutaaq

Atuakkap taaguutaa tassaavoq: Polar Bears in Northwest Greenland: an interview survey about the catch and the climate, atuagarlu Museum Tusculanums-ip nittartagaani saqqummersinneqarpoq (http://www.mtp.dk). Atuagaq 232-nik qupperneqarpoq titartagartarpassuaqarlunilu.

Paasissutissanik amerlanerusunik pissarsiniaraanni attaveqarfissaq:ilisimatusartoq angajulleq, Erik Born, Pinngortitaleriffik, oqarasuaat +45 32 83 38 25 imaluunniit e-mailikkut: ewb@ghsdk.dk

Imaluunniit immikkoortortaqarfimmi pisortaq, Fernando Ugarte: +299 36 12 42, e-mail feug@natur.gl