Niisat Kalaallit Nunaat kissarnerusoq atugarissaafigineruaat Saqqummersinneqarfia 25.10.2011
Ecology and Evolution-imi qanittukkut naqittumi ilisimatuut Pinngortitaleriffimmeersut allaaseraat Kalaallit Nunaata kitaani niisat klimap allanngornerinut qanoq qisuariarsimanerat allaat ilaatigut assut saarullittuumalersimallutik.
Kitaani immap 1980-ikkunniilli kissakkiartuaaginnanera peqatigalugu sinerissami tamaani sikuusarnera sivikilliartorsimavoq. Ukiuni kingullerni saarullinikkiartuinnarsimavoq niisallu ukiup ingerlanerani sikumit qaammatit marlussuinnaat akornusersugaasalersimagamik sivisunerujartuinnartumik Kalaallit Nunaata imartaaniittalersut saarulliit nanisinnaalluarpaat.
Ilisimatusartoq Maria Iversen sulianillu ataqatigiissaarisoq Jørgen Sethsen ilaliullugu niisanik pilattaasut. Asseq: Fernando Ugarte
Kitaani niisat biologiiat marloriarluni, ukiunik 14-inik akunneqartunik, misissorneqartarsimavoq; siullermik 1995-imi aamma 2009-mi ukiuni taakkunani niisat 103 aamma 89-it Paamiuni, Nuummi Maniitsumilu piniartunit misissugassatut pisiarineqartarsimallutik. Paasissutissat assigiinngitsut uuttortarneqarput: timaata kaajallalluni atitussusia assigiinngitsuni pingasuni uuttortarlugu, takissusia ilivitsuullunilu oqimaassusia aammalu orsuata kisimiilluni oqimaassusia uuttorneqarpoq, taamatullu utoqqaassusia aqajaruatalu imai misissorneqarlutik. Utoqqaassusia misissorneqarpoq kigutaani qaleriijaarnerit kisillugit aqajarormiuisalu suuneri aalajangerneqarlutik sinnikut arrorsimanngitsut aamma aalisakkat assigiinngitsut siunnaasigut aalisakkanik sutorsimaneri misissorlugit. Misissuinerit ilaatigut takutippaat arnavissat 1995-imut naleqqiullugit 2009-mi utoqqaanerusut aammalu miisat 2009-mi 1995-imi misissukkanit malunnartumik oqimaannerusut. Tamatumunnga pissutaavoq orsoqarnerunerat aammalu 2009-mi neriniagaasa allaanerulluinnarnerat. 1995-mi aalisakkat assigiinngitsut 11-t nerisarisimagaat paasineqarpoq, 2009-mili aalisakkat nerisisarisimasaat assigiinngitsut 23-iupput, taakkunanngalu saarullikkut pingaaruteqarnerpaallutik. Taamaalilluni siullerpaamik uppernarsaaserneqarpoq miluumasoq imarmioq immap kissarnerulerneranik iluaquteqartoq.
Ilisimatusartoq Nynne H. Nielsen immuanik misiliutissamik peersisoq. Asseq: Fernando Ugarte
Ataatsimut isigalugu immap kissarnerulernera aalisakkanut assigiinngitsunut periarfissarissaarnerulersitsimmat tamanna niisanit nutaanik nerisassaqalernikkut iluaqutigineqalerpoq taamaattumillu siornatigornit pualanerulerlutik. Aammalu misissuinerup takutippaa niisat siusissorujussuakkut kinguaassiorsinnaalersartut taamaattumillu tamanna takussutaasinnaagunarpoq niisat piniarnikkut pisaasarnerata imminut nammassinnaasoq tikissimagunaraa. Taanna kingulleq ukiuni tullerni erseqqinnerusumik misissorneqassaaq.
Allaaserisaq uani takuneqarsinnaavoq: http://onlinelibrary.wiley.com/doi/10.1002/ece3.51/full
