Sisimiut eqqaani sinerissap qanittuani 2012-imi saattuartassiissutissat ikilisinneqarnissaat biologit siunnersuutigaat Saqqummersinneqarfia 13.12.2011
Paasissutissat aalisartut pisanik nalunaarsuiffiineersut aammattaarlu biologit aqutsiveqarfiup (Sinerissamut qanittoq, Sisimiut) misissuiffiginerisigut assigiimmik takutippaat saattuaqatigiikkuutaat ikiligaluttuinnartut. Tamanna ilutigalugu saattuat nutaat takkussuuttut 2004-misut ikitsigipput. Taamaattumik 2012-mi saattuartassiissutigineqartussat 300 tonsinut ikilisinneqarnissaat Pinngortitaleriffimmiit siunnersuutigineqarpoq, agguarlugit siullermik Sisimiut kujataani kangerlunnut sisamaasunut 150 tonsit aappaattullu Nassuttuumut Isortumullu 150 tonsit. Taakku 2011-mi siunnersuutigineqartunut sanilliullugit 200 tonsinik ikinnerupput.
Sisimiut avataani Holsteinsborg Dyb-imi saattuat suli ikiliartortut nalunaarsorneqarpoq, taamaattumillu tassani saattuat amerlinissaasa tungaanut tassani saattuarniartoqassanngikkallartoq Pinngortitaleriffimmit siunnersuutigineqarpoq. Aqutsiveqarfiit allat eqqarsaatigalugit siunnersuineq 2011-mut sanilliullugu allannguuteqanngilaq. Saattuaqatigiikkuutaat tassani suli annikipput, taamaattumik Pinngortitaleriffiup siunnersuutigaa aalisarfinni tamani nalinginnaasumik piffissamik aalisarfiusussamik atuutsitsisoqalissasoq uku tunngavigalugit
- “atorfinitsitsiortorneq” qulakkeerniarlugu, imaappoq saattuat nutaat saattuaqatigiinnut pioreersunut ilanngussuunniassammata
- pisuussutit pitsaanerusumik atorluarneqarnissaat qulakkeerniarlugu
