Issittumi ilinniartitaanerit ilisimatusarnerillu nukittorsarneqarput Saqqummersinneqarfia 08.07.2012

Pinngortitaleriffik, Nuuk, University of Manitoba, Canada kiisalu Aarhus Universitet, Danmark, suleqatigiinnissamik isumaqatigiissummik sapaatiuppat 8. juli atsioqatigiissuteqassapput. Isumaqatigiissutip nunarsuarmioqatigiit Issittumi ilisimatusarnernik ingerlataqarnerannik nukittorsaavigiinnarnani Issittumi inuuniarnermi unammilligassanut arlalissuarnut tunngassuteqartuni ilinniartitaanerittaaq nukittorsaavigissavai.

Kalaallit Nunaaniit, Canadamiit Danmarkimiillu ilisimatusarnikkut suleqatigiilernermi nutaami Issittumi ilisimatusartartut nunarsuatsinni nuimanerpaat 200-t ataqatigiissinneqassapput suleqatigiilluarnerulersinneqarlutillu. Qulequttat suleqatigiissutigineqartussat siamasittupilussuussapput peqqissutimut, inuiaqatigiit aningaasarsiornerannut kiisalu avatangiisinut silallu pissusaanut tunngassuteqartunut attuumassuteqassallutik.

Taamatut suleqatigiilerneq taaguuserneqarpoq: ”Arctic Science Partnership” (ASP – Issittumi ilisimatusarnerit pillugit peqatigiilerneq). Suleqatigiilernerup kingunerissavaa Issittumi unammilligassanut sammitillugu ilisimatusarnerit, ilinniartitaanerit aammalu paasissutissanik avitseqatigiittarnerit angusaqaataanerusumik kinguneqalersinnissaat.

Nunat isumaqatigiissummik atsioqatigiissuteqartussat tamarmik immikkut misissuiffinnik, ilisimatusaatigalugu umiarsuarnik, misissuinernik atortunik misissuivinnillu pigisaqarput ilisimatusartartut nunanit taakkuninngaanneersut killeqanngitsumik atorsinnaaligassaannik.

ASP-mik isumaqatigiissuteqarnerup siunertaa pingaaruteqartoq tassaavoq Issittoq pillugu ilinniartitaanerit ilisimasallu Issittumi suli annertunerusumik sunniuteqarnerunissaat anguniarneqarmat – pingaartumik Kalaallit Nunaat Canadalu eqqarsaatigalugit. Tassa siunissami ilinniartut nunat uku pineqartut ilisimatusarfeqarfiini ilinniartitsissutini assigiinngitsuni peqataasalersinnaassapput, taamaalilluni ilinniartitaanikkut periarfissat pitsanngorsaavigineqassallutik.

– Issittoq allanngoriartornernik annertoorujussuarnik aqqusaagaqarpoq, taamaattumik uagut ilisimatusartartut unammilligassanut nutaanut malinnaalluarniartariaqarpugut Issittumi innuttaasut kingunissaasinnaasut pillugit siunnersorluarumallugit, Pinngortitaleriffimmi proffessor Søren Rysgaard oqarpoq. Taanna Professor David Barber, University of Manitoba-meersoq, peqatigalugu isumaqatigiissutigineqartussap nutaap uumap piviusunngortinneqarnissaa siuttuuffigisimavaat.

Søren Ryesgaard-ip qularinngilluinnarpaa suleqatigiilernerup matuma nutaap kinguneriumaaraa Issittoq pillugu ilisimatusarnerit nunarsuarmi tamarmi siuttuuffigineqartumik qitiuffeqalernissaat.

Isumaqatigiissummik sapaammi 8. julimi atsioqatigiissuteqartussat ilisimatusarfeqarfiit ittui pisortaallu Nuummi Pinngortitaleriffimmi ulluni 5. julimiit 8. juli ilanngullu ataatsimeeqatigiissapput.

Itinerusumik paasisaqarusunnermi saaffigisassaq:

Pinngortitaleriffimmi professor Søren Rysgaard oqarasuaat: 585 489