Nunatta imartaani raajaqassuseq appariartuaarsinnarpoq Saqqummersinneqarfia 07.11.2012
Kalaallit Nunaata kitaata imartaani raajat 80.000 tonsit. Tassaavoq Pinngortitaleriffimmi biologit Naalakkersuisunut 2013-imi raajartassiissutigineqarsinnaasutut qummut killissatut siunnersuinerat.
Raajarniarnermut tunngatillugu biologit 2012-imut siunnersuinerminni 90.000 tonsit killigitippaat, maannalu 2013-imut suli appasinnerusumik raajartassiisoqarnissaanik siunnersuinerinut raajaqassutsip suli appariartorneranik takussutissiivoq.
Biologit Tunup imartaani raajartassiissutigineqarsinnaasutut siunnersuinerat allannguuteqanngilaq, tassa 2013-imut 12.400 tonsiullutik.
Nunatta Kitaata imartaani raajanut tunngatillugu biologit pisassiissutigineqarsinnaasutut, ikiliartuinnavittunillu, siunnersuinerat makkuninnga tunngaveqarpoq:
· Raajat ikiliartuinnavipput, tassa oqimaassusinngorlugu amerlassusiat eqqarsaatigineqarluni
· Siunissami aalisarneqarumaartussanik raajaaqqanik aatsaat taamak ikitsigisunik takkussuuttoqarnera
· Saarulliit raajaqarfinniittut oqimaassusinngorlugu 2012-imi amerlassusiat ikigiinnagassaanngillat, saarulliillu raajatortarmata raajartassiissutaasinnaasut naatsorsuusiorfigineqarnerini ilanngunneqartariaqarlutik. Tamannali ima paasineqassanngilaq saarulliit raajaqarfinniittut aalisarneqarsinnaasut tassa amerlasimassasut, tassami kingumut qiviarluta saarulleqarluarnerata nalaani amerlassusiat nallersuussinnaanngilluinnarmat
Biologit misissuinerisa ersersippaat nunatta Kitaata imartaani raajat (oqimaassusinngorlugu amerlassusiat) 2003-miit 2012-ip tungaanut ikiliartuinnavissimasut. Pingaartumik avataani peqarfinni malunnaatilimmik ikileriarsimapput. Maanna raajat amerlassusiat 1990-ikkut naalernerani amerlassutsinut sanilliunneqarsinnaapput. Taamanikkut agguaqatigiissillugu ukiumut pisaasartut 80.000 tonsiusarput.
Peqatigisaanik raajarniartartut pisanik nalunaarsuutaanni takuneqarsinnaavoq ukiuni 2009-miit 2012-ip tungaanut raajat aalajangersimasumik amerlassusillit pisariniarneranni nukiit (piffissaq atorneqartartoq tamatumalu nassatarisai) amerlanerusut atorneqartalersimasut ukiunut 2005-imiit 2008-mut sanilliullugu.
Maanna ukiuni makkunani raajat amerlavallaannginnerini aalisarneqarnerat sakkortuallaassappat raajaqassuseq peqarluarneranut sanilliullugu sunnertianerussaaq. Raajaqassuseq sunnertianerulissaaq, taamaattumillu biologit naliliipput 80.000 tonsit pisassiissutigineqassappata taamaaliorneq piujuartitsiniarnermik tunngaveqassasoq imaluunniit peqassutsimut ikiliartuutaalaartumik sunniuteqarsinnaassasoq. Naatsorsuinerit takutippaat 80.000 tonsinik pisassiisoqassappat taava piujuartitsinermik tunngaveqartumik annaasaqaataasartutut naatsorsuutigineqartartut 34 %-imik sipporneqassasut. Biologit taama naliliinerat siorna naliliinerattut iinnarpoq. Piujuartitsinermik tunngaveqartumik annaasaqaataasutut taaneqartartoq tassaavoq raajaqassutsip oqimaassusinngorlugu raajarniarnermit kiisalu saarulliit raajatortarnerisa kingunerisaanik tamakiisumik raajaqassutsimut ilanngaataasarnerat.
Tunumi raajartassiissutigineqarsinnaasutut biologinit innersuussutigineqartut 12.400 tonsit 2004-miilli allannguuteqartinneqanngillat. Tappavanili pisaasartut 2003-miilli ikiliartuaaginnavissimapput, tassa 13.000 tonsiniit 2012-ip naajartornerani 2.000 tonsit angunagit pisarineqartalerlutik. 2012-imi biologit misissuinerinit kiisalu raajarniartartut paasissutissaataannit takuneqarsinnaavoq tamaani peqassuseq appariaateqalaarsimasoq, ukiunilu aggersuni pissutsit taamaaginnassappata pisassiissutaasartut ikilisinneqarnissaannik biologit siunnersuipput.
Raajat pillugit siunnersuineq 2013
Itinerusumik paasisaqarusunnermi saaffigisassaq:
Aalisakkanut qalerualinnullu immikkoortortaqarfimmi pisortaq Helle Siegstad oqarasuaat 361200 imaluunniit mail: hesi@natur.gl
