Pinngortitaleriffik attaveqatigiinnermut pisortartaarpoq Saqqummersinneqarfia 05.10.2012
Tusagassiortoq Emma Kristensen Pinngortitaleriffimmi attaveqatigiinnermut pisortatut sulilerpoq. Taama atorfinitsitsinermi siunertaavoq Pinngortitaleriffiup inuiaqatigiilu akornanni attaveqatigiittarnerup nukittorsaavigineqarnissaa, taamaattumillu Pinngortitaleriffiup attaveqatigiinnermut tunngatillugu atorfeqartitaasa amerlisarneqarnerinut attuumassuteqarluni. Emma Kristensen Namminersorlutik Oqartussat Tusagassiiviannit paasissutissiinermut pisortatut kingullermik atorfeqarpoq, tamannalu sioqqullugu Pinngortitaleriffimmi paasissutissiisartutut ukiuni tallimani sulilluni. Pinngortitaleriffimmi sulinermi nalaani taamaalilluni suliffeqarfiup avammut kiinarisimavaa ilaatigut Namminersorlutik Oqartussat pisuussutit uumassusillit pillugit Tulukkamik taallugu paasititsiniaaneranni suleqataalluni.
– Emma Kristensenip Pinngortitaleriffimmut uteqqinnera nuannaarutigisorujussuuarput, Pinngortitaleriffimmi pisortaq Klaus Nygaard oqarpoq.
– Emma Kristensen Kalaallit Nunaanni ilisarisimaneqarpoq, pingaartumik aalisartut piniartullu akornanni. Aamma Namminersorlutik Oqartussat ataanni sulinermi nalaani avatangiisinut tunngassuteqartunik suliaqarnermik misilittagaqarluartuuvoq, maanilu Pinngortitaleriffimmi tamanna atorfissaqartipparput, siunissamimi aggersumi avatangiisinut tunngatillugu apeqqutini suliaqarneruartornissarput naatsorsuutigigatsigu, Klaus Nygaard naggasiivoq.
