Tunumi qalerallit, suluppaakkat ammassaallu ikippallaarput Saqqummersinneqarfia 13.06.2012
Tunumi, Islandimi Savalimmiunilu qalerallit 26.000 tonsit pisarineqartarput. Massakkut biologit siunnersuutigaat pisat tamakkerlutik 20.000 tonsinut ikilineqassasut isumalluut taanna pitsaanerpaamik atorsinnaajumallugu. Kalaallit imartaanni 11.000 tonsit pisarineqartarput taamaattumik tamaanissaaq pisaasartut appartinneqarnissaat pisariaqarpoq. Qalerallit tamaaniittut 2004-mi ikinnerpaasimapput, ukiunilu tulliuttuni amerlassusaat nikeriarpallaarani annikissimalluni. Nuannaarutissaavorli annikikkaluamik pitsanngoriartortoqarsimammat. Pisarisartakkat ullumikkutut ingerlaannassappata (26.000 tonsit) qalerallit ikileriarnissaat aarlerinartorujussuuvoq. Qaleraleqarfiit Kalaallit Nunaanni, Islandimi Savalimmiunilu katisimapput, nunallu sineriaqartut aqutsisoqarnissaanik 2012-imi isumaqatigiissuteqarput, alloriarneq siulleq tassaalluni pisanik ikilisitsinissaq, peqatigitillugulu qaleraleqatigiinnik biologit misissuisarneratigut aalisarnerlu aqqutigalugu nakkutilliinissap qularnaarneqarnissaa.
Tunumi nunap tunngaviani nutaamik suluppaagarniarneq nutaaq aallartippoq 2009-mi 7.000 tonsit angullugit pisaasarlutik. Biologit massakkut pisassat affaannanngortinneqarnissaat siunnersuutigaat (3.500 tonsinut). Taama siunnersuisoqarneranut tunngaviuvoq biologit misissuinerisa takutimmassuk aalisagaqatigiit ikinnerulersimasut, aammalu tamatuma peqataannik aalisarneq aalisarfimmi aaliangersimasumi annikinnerujartuinnartumi ingerlanneqalermat. Aalisagaqatigiillu taakkua ukioqatigiinnik ataasiinnarnik marlunnilluunniit aalisagartaqarput.
Ammassaat immami Tunup, Islandip Jan Mayenillu eqqaanniittumiipput. Siusinnerusukkut annertoorujussuarmik aalisarneqarsimapput, 2005-minngaanniillu amerlassusaat annikippallaarsimalluni. Siunnersuummi nutaami 2013-imut tunngasumi inassutigineqarpoq ammassaat aalisarneqassanngitsut ammassaqatigiit aalisarneqarneq nammassinnaaneraat paasineqartinnagu. Tamanna paasissutissat nutaat 2012-imeersut paasinarsisikkumaarpaat.
Kitaani sinerissap qanittuani avataasiorlunilu qaleralinniarnermut siunnersuisartuuvoq siunnersuisartoqarfik NAFO, taannalu junip naalernerani siunnersuuteqartussaavoq. Immikkut tusagassiuutitigut nalunaarutikkut saarulliit pillugit siunnersuut nassiunneqareerpoq.
