Helle Siegstad sulinermini ukiut 25-nngortorsiorpoq Saqqummersinneqarfia 06.06.2013
Allattoq: Mikv
Biolog Pinngortitaleriffiullu Aalisakkanut Qalerualinnullu Immikkoortortaqarfiani pisortaq Helle Siegstad pisortani atorfeqarnermini ukiut 25-nngortorsiorluni qanittukkut nalliuttorsiorpoq.
Københavnip Universitetianit Biologisk Institutimit biologitut qulequtserlugu ”Natsiit nerisartagaat” 1988-imi naammassissuteqareernermi kingorna Helle Siegstad nunatsinnut attuumassuteqartuinnarnik suliaqarpoq.
Suliami ilaatigut nunatsinni ilisimaneqarluartoq pinngortitap oqaluttuassartaanik ilisimasartooq H. C. Petersen peqatigalugu Helle Siegstad nunatsinni pisuussutit uumassusillit pinngortitamilu eriagisat pillugit paasissutissarpassuarnik katersueqataavoq nalunaarsueqataallunilu. Taamaalilluni uumasut ataasiakkaat pillugit paasissutissat, atugassarisaat, iluaqutigineqarnerat, amerlassusiisa nikerarnerannut kiisalu paasissutissat inuit uumassuseqassutsimut sunniutigisartagaannut tunngassuteqartut 1988-imiit 1990 tikillugu katersorneqarput. Paasissutissat nunatta inoqarfiinit tamangajannit katersorneqarput, taamaattumillu suliaq immini imaannaanngitsuuvoq.
Pinngortitaleriffiup suliassaqarfiisa qanga Grønlands Fiskeriundersøgelser-mit nunatsinnut nuunneqarnerisa peqatigisaanik Helle Siegstad Aalisakkanut Qalerualinnullu Immikkoortortaqarfimmi pisortanngortussatut toqqagaavoq. Taamanerniit Helle Siegstad nunarsuarmi tamarmi ilisimatuussutsikkut suliniaqatigiiffiit suleqatigalugit nunatsinni aalisakkat pillugit ilisimatuussutsikkut siunnersuinerpassuarni suleqataalerpoq.
”Suliumatoorsuuvutit suliassannut suleqatinnullu tunniusimalluinnartuullutit, suullu tamarmik ajornerpaaffianniikkaluaraangata nakkaannanngisaannarputit. Ilaatigut Immikkoortortaqarfinni sulisussaaleqillutit naalliuperaartaraluarlutit ilisimatuussutsikkut siunnersuinerit tamatigut piffissaq eqqorlugu tunniuttarpatit. Aammalu umiarsuit misissuutigisartakkatta ingerlanneqarneranni qitiulluinnarlutit pingaaruteqarputit”, Pinngortitaleriffimmi pisortaaneq Klaus Nygaard Helle Siegstadimut oqaaseqarnermini ilaatigut taama oqarpoq.
