Ilisimatusarnernut aningaasaliissutit millionilikkaat Saqqummersinneqarfia 14.02.2013
Pinngortitaleriffik ilisimatuunngorniarluni ilinniartitaanernut Danmarkimit 9,7 million koruuninik aningaasaliiffigineqarpoq, ilinniartitaanerit taakku taaneqartarput ph.d. aamma postdoc ilinniarnerit. Aningaasaliissutigineqartut atorneqassapput Kalaallit Nunaanni ilisimatusarnerup ineriartortinneqarnissaanut aammalu ilisimatusartartunik qammaanernut.
Siunertanuttaaq taakkununngarpiaq Ilinniartitaanermut Ilisimatusarnermullu Naalakkersuisoqarfik Pinngortitaleriffimmut 2,1 million koruuninik aningaasaliissuteqarpoq.
”Aningaasaliissutit issittumi ilisimatusarnernut kiisalu Danmarkip Kalaallit Nunaatalu akornanni ilisimatusarnikkut suleqatigiinnernut siuarsaataassaqaat. Taamatut ilinniartitseqqittarnerit Kalaallit Nunaata siunissaanut ilisimasatigut piginnaasatigullu siuarsaaniarnernut iluaqutaassaqaat, ” Pinngortitaleriffiup pisortaa Klaus Nygaard oqarpoq.
Ilisimatusarnernut aningaasaliissutaasartut aqunneqarnerat Kalaallit Nunaanni ilisimatuussutsikkut misissuisarnerit pillugit Ataatsimiititaliarsuup ukiup naanerani atorunnaarsinneqarnera peqqutaallu Pinngortitaleriffimmut nuunneqarput. Danskit issittumi ilisimatusarnernut aningaasaliissutigisartagaat danskit aningaasanut inatsisaatigoortumik aningaasaliiffigineqartarput.
Aningaasaliissutigineqartut katikkaanni 2013-imi Ph.d.-rlutik ilinnialersinnaassapput sisamat Post doc-erlu ataaseq.
Ilisimatusariaatsini sammivinni tamaginneersut qinnuteqarsinnaatitaapput.
Qinnuteqarfissaq kingulleq tassaavoq 15. april 2013.
Qinnuteqarniarluni immersugassat uani aaneqarsinnaapput:
Itinerusumik paasisaqarusunnermi saaffigisassaq:
Pinngortitaleriffimmi pisortaq Klaus Nygaard, oqarasuaat 361200
