Ilisimatusartartunut aningaasaliissutissat soqutigineqarluinnarput Saqqummersinneqarfia 29.04.2013

Ilisimatusaatigalugu doktor-inngorniarnernut, Ph. D., aammalu doktor-ioreersunut ingerlaqqiffiusumut, Post doc., qinnuteqartitsisoqarmat qinnuteqaaterpassuit 42-t Pinngortitaleriffimmit tiguneqarput.

Taakkununnga qujarunnaqisumik aningaasaliissuupput danskit naalagaaffiata issittumut aningaasaliissutinik taallugit 9,7 mio. koruunit aammalu Ilinniartitaanermut Ilisimatusarnermullu Naalakkersuisoqarfimmit 2,2, mio. koruunit. Aningaasaliissutinit ilisimatusartartut tallimat atorfinitsinneqarsinnaanngussapput, neriuutigineqarporlu ilisimatusartartut nunatsinniittut amerlisarneqarsinnaanissaat aammalu danskit-kalaallillu ilisimatusarnikkut suleqatigiittarnerisa patajaallisarneqarnerunissaat anguneqassasoq. Aningaasaliissutit ilisimatusaatinut assigiinngitsunut, soorlu oqaatsit/oqaluttuarisaaneq/upperisarsiorneq/eqqarsaqqissaarneq assigisaasalu (tassa humaniora), aammalu inuiaqatigiit pinngortitarlu pillugit ilisimatusarnernut atorneqarsinnaassapput.

”Kalaallit Nunaanut tunngatillugu nunarpullu pillugu ilisimatusarnerit soqutigineqarluinnarnerat qinnuteqartitsinermi takuneqarsinnaavoq. Nuannerluinnarpoq, tassami neriullualersitsivoq siunissami ilisimatusarnikkut piginnaasat qaffassarneqarnissaannut aammalu ilisimatusaatigineqartartut sammiviit ullumernit amerlanerusut nunatsinni iluaqutigineqarsinnaanissaasa annertusarneqarnissaannut,” Pinngortitaleriffiup pisortaa iluarisimaaqisoq Klaus Nygaard oqarpoq.

Kalaallit Nunaani ilisimatusarnernut tunngatillugu Ataatsimiititaliarsuaq aningaasaliissutinik siuliani pineqartunik allaffissornikkut siusinnerusukkut isumaginnittuusarsimavoq, Ataatsimiititaliarsuarli ukiup nikinnerani atorunnaarsinneqarmat allaffissornikkut aqutsinertaa Pinngortitaleriffimmut nuunneqarpoq.

Qinnuteqaatit nassiunneqarsimasut maanna Danmarkimi ilisimatusarnikkut siunnersuisooqatigiimmit imarisamikkut nalilersorneqaqqaassapput, kingorna ilisimatusariaatsinit sammivinnit arlalinneersunik inuttaqartumik siunnersuisooqatigiimmit nunatsinneersumit pingaarnersiorneqarlutik immikkoortiterneqassallutik. Qinnuteqaatinik nalilersuinissaq qaammatit arlerlugit sivisussuseqassaaq qinnuteqarsimasullu allatut ajornartumik naammagittaqqaartariaqassapput.

Itinerusumik paasisaqarusunnermi saaffigisassaq:
Pinngortitaleriffiup pisortaa Klaus Nygaard oqarasuaat 361200.