Kitaata imartaa kiannerulerpoq Saqqummersinneqarfia 23.08.2013

Allattoq:  PeMi

Qujanartumik DMI-mi (Danmarks Meteorologiske institut) Center for Ocean og Is-imi periuseq ineriartortinneqarsimasoq atorneqartorlu atorlugu qaammataasanit quliusunit paasissutissat misissoqqissaarneqarnerisigut allorniusaq sanimukartup avannarliup 58-ip avannaani immap qaavata kiassusia tamarmi ilisimaneqalerpoq. 1982-imiit ullumikkumut kiassutsip allanngornera 0,2 gradinik eqqoqqissaartumik uuttortarneqarsinnaapput. Periuseq taanna iluaqutigalugu ukiuni 30-ni kingullerniit ullumikkumut ilisimatusartut kissassutsinik eqqornerusumik takussutissinnaalersimavaat. Suliaq tamanna Silap Pissusianik  Ilisimatusarfimmi suliarineqarpoq.

 DMI-imi imavissiuup Jacob L. Høyerip kingumut 1982 tikillugu qaammataasanit paasissutissat attuumassuteqartut tamaasa, qaammataasanit NOAA-p pigisaanit paasissutissat pissarsiarineqarsinnaasut atorlugit, misissoqqissaarsimavai. Qaammataasanit nutaanerpaanit pitsaanerpaanillu paasissutissat pitsaanerpaat atorlugit iluarsiisoqarpoq, taamaalilluni ilisimatusartut Issittumi tamarmi allanngornerit kisiisa paasisaqarfiginngilaat aammali nunat immikkoortuini allanngornerit qanoq innersut paasisaqarfigalugit. Issittumi immap kiassusiata allanngorneri ukiuni kingullerni silap allanngorneranik ersarissumik takussutissiipput. Assersuutigalugu 1982-imiit ullumikkumut Kitaani Qeqertarsuup eqqaani immap qaava kiannerpaanngorsimavoq. Immap kiassusia 1980-kkunnut sanilliullugu aasakkut ullumikkumut nalinginnaasumik 2 – 3° C-inik kiannerulersimavoq.