*Required
*Required
*Required
*Required
*Required
*Required
*Required
*Required
Send
Thank you for your application!
 

Nunatta kujataani: Imaq Irmingerip sarfaassaa annikilliartorpoq

Assimi: Sakkutooqarfiup nakkutilliissutaanit Tulukkamit isikkivik alianaatsoq takuneqarsinnaalluni Nuup Kangerluani sermersuup iigartarfiata aniavia. Assiliisoq: Mads Hvid Ribergaard.

Allattoq:  Emma Kristensen

Irmingerip sarfaa, tassa sarfap Golfstrømmip sanileqitaata, sakkukillisimavoq maannalu pissusitoqqaminut uteriartulersimalluni ukiorpaaluit sakkortunerusumik sarfarsimareerluni. Tamanna misissuinerit nutaajunerpaat paasinarsisippaat.

Silasiorfeqarfiup DMI-p Imaanut immikkoortortaqarfia, Center for Ocean, Pinngortitaleriffik suleqatigalugu nunatta kitaata imartaanik nunap isuaniit Sisimiut avannaatungaa ilanngullugu ukiut tamaasa misissuisarput.

Misissuinerit kingulliit paasinarsisippaat immap nunatta kujataatungaaniittup tarajoqassusia agguaqatigiissitsinermiit appasinnerulersimasoq, tassa taqqavani imaq tarajuisannerulersimalluni. Misissuiffigisat avannarpasinnerusortaanni allannguutit taama malunnartiginngillat, tamaanimi imaq suli tarajuungaatsiarpoq kissangaatsiarlunilu.

Peqatigitillugu misissuinerit allat paasinarsisippaat Tunup imartaani sarfaq, Issittup imartaanik qaatungimigut nillertumik tarajuisaasattumillu akulik, sakkukilliimisimasoq. Fyllas Bankimi immap qaavatungaa akunnattumik tarajuuvoq immallu kissassusia nalinginnaasumiit halv gradinik kissarneraaq.

Kujataata ikkannersuini itinerumaartuni imaq nalinginnaasumit suli kissarnerusumik akoorneqarpoq, naak imaq suli akunnattumik tarajuugaluartoq.

”Nassuiaat unaagunarpoq Atlantikup Avannaatungaani immap qaavatungaa suli kissatsikkiartuaarpoq, taamaalilluni imaq Irmingerip sarfaata Kalaallit Nunaata kujataatunganut ingerlattagaa Issittup imartaanut oqinnerusumut akulerukkaangami taassuma ataatungaanut pisarsimassammat,” taama Silasiorfeqarfiup DMI-p Imaanut immikkoortortaqarfiani seniorforsker Mads Hvid Ribergaard oqarpoq.

” Kalaallit Nunaanni sermersuup ukiuni kingulliunerusuni anisisarneri eqqarsaatigalugit Irmingerip imartaata annikinnerulersimanera paasillugu soqutiginaateqarpoq, tassami ukiuni kingulliunerusuni allanngornerujussuit ilaatigut Irmingerip imartaata allannguuteqarneranut attuumassuteqartinniarneqartarmata. Irmingerip imartaata ukiormanna annikinnerulersimanera ataasiartaanersoq imaluunniit nangittumik taamaattuassanersoq maannaagallartoq eqqoriaruminaappoq. Ukiuni aggersuni uuttortaasarnerit paasinarsisikkumaarpaat,” Mads Hvid Ribergaard oqarpoq.

Kalaallit Nunaata kitaata imartaani sarfanut tunngatillugu ilisimasat

Misissuisarnerni siunertaavoq immap kissassusaata nikerarnera malinnaaffigissallugu. Pinngortitaleriffimmeersut paasissutissat taama ittut imaani avatangiisit imartanilu aalisagaqatigiiaat pingaarnerit amerlassusaasa nikerarnerisa ataqatigiinnerannik ilisimatuussutsikkut misissuisarnerminni atortarpaat. Aammalu ukiut 60-it sinnerlugit misissuisarsimanerit Atlantikup Avannaatungaani imartani sarfat nikerartarnerisa tamakkiimanerusumik paasisaqarfiginissaanni pingaaruteqartuupput.

Immap kissassusiata nillissusiatalu nikerarnerat malinnaaffiginiaraanni ukiorpassuarni misissuisarsimanernit inernerit tunngavigineqartariaqarput. Tunup kujataatungaaniittut kitaatalu kujataatungaaniittut aalisarfiusartut ikkannersuit imartanit issittuneersunit kiannerumaartuninngaanniillu  imartalersorneqartuupput.

  •  Irmingerip imartaa kissalaartoq tarajoqarluartorlu. Imaq taanna Irmingerip sarfaanik ingerlanneqartarpoq, Atlantikup avannaatalu sarfaata aamma Golfstrømmimik taaneqartartup sanilequtaralugu.
  • Issittup imartaa taavani Qalasersuup imartaaneersuuvoq, nillertuulluni tarajoqarpallaarnanilu. Imaq sikutaqaqaluni Tunup sarfaanit kujammukaanneqartarpoq.

Imartat taakku marluk Irmingerip imartaata avannarpasissortaani Danmarksstrædetimilu siullermeerlutik naapittarput, kingornalu Tunup sineriaa atuarlugu sanileriillutik kujammukaartarlutik.

Imartat ingerlaarnerminni akulerukkiartuaartarput, Irmingerillu sarfaata aammalu Tunup sarfaata sakkortussusii apeqqutaallutik Tunup kujataatungaata imartaani aammalu kitaata imartaani ikkannerni immap qanoq issusia aalajangerneqartarluni. Taamaalilluni Atlantikup avannaatungaani sarfat ingerlaartarneri imartat nillissusiannut kissassusiannullu aalajangiisuusarput.

Allattoq: Marianne Brandt, DMI.