Issittumi ilisimatusartartunngornianut miliuunerpaaluit Saqqummersinneqarfia 13.02.2014
Ilisimatusartartunngorniarluni ilinniartitaanernut, ph. D.-nngorniarnernut aammalu post doc-itut atorfimmut aningaasaliissutit qinnuteqarfigeqqinneqarsinnaanngorput. Aningaasaliissutit 10 million koruunit pd.d.-nngorniarluni atorfinnut pingasunut aammalu post doc-itut atorfimmut ataatsimut ukiormannamut atorfinittussanngorluni qinnuteqaatigineqarsinnaanngorput.
Danskit naalagaaffiata aningaasaliissuteqarfigai ph.d.-ngorniutissat marluk aammalu post doc-itut atorfik ataaseq, taakku Issittumi Ilisimatusarnernut aningaasaliissutineersuullutik. Namminersorlutik Oqartussat ilisimatusarnernut aningaasaliissutinit ph.d-nngorniutissaq ataaseq aningaasaliissuteqarfigaat.
Aningaasaliissutit Danmarkip Kalaallit Nunaatalu akornanni ilisimatusarnikkut suleqatigiinnermut siuarsaataassapput, ilisimatusarnerup ineriartortinneranut kiisalu apeqqutini nunatsinni ilisimatusarnernut tunngassuteqartuni ilisimatusartartussanik inuusuttunik qammaanermi iluaqutigineqassallutik. Qinnuteqaatit Kalaallit Nunaanni Ilisimatusarnermut Siunnersuisooqatigiinnit ilisimatusariaatsinit tamaginneersunit tunuliaqutaqartumit pingaarnersiorneqassapput, Pinngortitaleriffik allaffissortuulluni.
”Qinnuteqartitsinerput siorna iluatsilluartupilussuuvoq, qinnuteqaatit 42-t tigugatsigit. Nuanneqaaq taama soqutiginnittoqartigimmat, paasinarpormi Kalaallit Nunaannut tunngassuteqartuni ilisimatusarusunnerit soqutigineqarluartut. Aningaasaliissutitigut ilisimasanik piginnaasanillu pilersitsineq tamakkiisoq Kalaallit Nunaata pisariaqartippaa”, Pingortitaleriffiup pisortaa Klaus Nygaard oqarpoq.
Pinngortitaleriffik aningaasaliissutinik aqutseqqaarpoq siorna, tassa Kommissionen for Videnskabelige Undersøgelser i Grønland 2012-ip naanerani atorunnaarnerata kingorna.
Ilisimatusariaatsini sammivinnit tamaginneersut qinnuteqarsinnaatitaapput.
Qinnuteqarfissaq kingulleq tassaavoq 15. april 2014.
Qinnuteqarniarluni immersugassat uani aaneqarsinnaaput.
Itinerusumik paasisaqarusunnermi saaffigisassaq:
Pinngortitaleriffiup pisortaa Klaus Nygaard oqarasuaat 361 200
