Pinngortitaleriffimmeersut Tunumi nannunik kisitsinialersaarput Saqqummersinneqarfia 05.12.2014

Nannuninguna kisitsineq pisariullunilu akisuujusoq. Tamannalu peqqutaaqataalluni nannut nunatta kangianiittut kisinneqarsimanngisaannarput. Taamaakkaluartorli Pinngortitaleriffimmi ilisimatusartartut kisitsisinnaanissaq siunertaralugu piareersaatinik suliaqarlutik aallartereerput, 2019-imi Tunumi nannut pillugit siunnersuinerugallartumik saqqummiussisinnaanissaq siunertaralugu.

Tassami kisitsisinnaanissaq siunertaralugu piareersaanermut aningaasartuutissanut Pinngortitaleriffik Danmarkimi Avatangiisinut Qullersaqarfimmit aningaasaliiffigineqarnikuuvoq. Taamaalilluni ukiortaamiit piniartunik nannunniartartunik Tasiilap Illoqqortoormiillu pigisaaneersunik tusarniaalluni apersuinerit aallartinneqassapput.

Tusarniaanerni Pinngortitaleriffimmit apersuititaasussanit Tunumi piniartut nannut pillugit ilisimasaannik tamaginnik katersisoqassaaq. Ilisimasat tamakku aamma tunngavigalugit nannunik misissuinissat ilusissaannik pilersaarusiorneqarnissaannullu piniartut peqataatinneqassapput. Kiisalu ilisimatusartartut ukiut tulliuttut atorniarpaat Tunumi nannut pillugit ilisimariikkanik misissuinernut aamma piniartut nannunniarnernit nalunaarutigisartagaannik misissuinernut.

Tasiilap eqqaani nannunut qaammataasanut nassitsissusilersuinissat 2015-ip upernarnerani ilisimatusartartunit Pinngortitaleriffimmeersunit aallartinniarneqarput. Nassitsissutit iluaqutsiullugit nannut nikerartarnerat malinnaaffigineqarsinnaalissapput, taamaalilluni nanoqatigiiaat immikkooruteqarnersut paasiniarneqassaaq imaassinnaammammi immikkoortillugit aqutsivigineqarnissaat pisariaqarsinnaasoq.

Pinngortitaleriffimmeersut ukiorpassuarni piniartunik suleqateqarluareerput, tamatumalu attatiinnarneqarnisaa kissaatigineqarluni. Nannut kingornuttagaasigut 2015-ip ingerlanerani misissuiffigineqassapput, taamaaliornissanilu piniartut Ittoqqortoormiut Tasiilarmiullu misissugassanik katersitinneqartarniarput. Misissuinertigut paasiniarneqarpoq nanoqatigiiaat immikkooruteqarnersut. Taamaattumik piniartut nannukkaangamik piniarnermit immikkut ittumik nalunaarsuiffinnut immersuisarnissaat aammalu misissugassamik kigutaaraanillu peersillutik nassitsisarnissaat pingaartuuvoq.

Tunup avannaarsuata imartaani uuliasiorfissatut ammaassivioreersumittaaq nannut amerlassusiat paaserusunneqaraluarpoq aammalu uuliasiornerit nannunut sunniutigisinnaasaat paaserusunneqarluni. Tunumi sumiiffiit nannununik misissuiffiuniartut katillugit million kvadratkilometerinik isorartussuseqartut, tassa Frankrigip Tysklandillu nunataasa katillugit angeqqataat. Tunu oqaatigineqartarpoq nunarsuaq tamakkerlugu nannut uumaffiisa annersarigaat.

Tunumi misissuinissanut pilersaarutaasut qulaani taakkartorneqartut piviusunngortissinnaanissaannut apeqqutaassaaq avataaniit aningaasaliissutinik naammattunik ukiuni aggersuni pissarsisoqarsinnaassanersoq.