*Required
*Required
*Required
*Required
*Required
*Required
*Required
*Required
Send
Thank you for your application!
 

Tuttut ilaat qumaarsussuaqaqqilerput

Assimi: Tuttuaqqap september 2005-imi Maniitsumi pisarineqarsimasup neqaa Taenia krabbei-ip qullugiassaanik manniusatut isikkulinnik pilik. (Assiliisoq: Mogens Torp & Henrik Hartmann)

Qumaarsussuit aammalu qumaarsussuit qullugiaat tuttut neqaanniittut inunnut tuniluussinnaannginnerat ilisimaneqarpoq. Taamaakkaluartoq neqit ooqqissaarlugilluunniit siaqqissaarneqartarnissaat inassutigineqarpoq.

Pinngortitaleriffik ukiut kingulliit qulit ingerlanerini  Qeqqata Sermersuullu kommuniini aavarianit, tuttut neqaanni manniusanik eqqumiitsunik nassaarsimasunit saaffigineqartarsimavoq (Titartagaq 1). Tamakku tassaapput qumaarsussuit Taenia krabbei-t qullugiaat. Siornatigut tamakku immikkut uumasuunasorineqartarsimapput, taamaattumillu immikkut uumasuusutut taaguuserneqarsimallutik, Cysticercus taranti.

Qumaarsussuit Taenia krabbei qumaarsussuartut inersimasunngoraangamik neqituumasut, soorlu assersuutigalugu teriannissat qimmillu erlaviiniilersarput. Uumasut tamakku qumaarsussuaqarajunnerpaajusarput (tassa uumasut inersimasunik qumaarsussuaqartartut qumaarsussuaqarajunnerpaatut taaneqartaramik). Tuttulli qumaarsussuit peroriartorfigisarpaat, qullugiaanerminni najortarlugit.

Qumaarsussuaqarajunnerpaani, soorlu assersuutigalugu teriannissami, qumaarsussuaq inersimasoq uumasup erlaviiniittarpoq. Qullugiaq inersimasunngoraangami, timimi immikkoortuisa kingullersaanni manniusassanik pilersitsilersarpoq. Manniusat ineriartornerat naammassigaangat, qumaarsussuup timaata immikkoortua kingulleq manniusat ineriartorfigisaat isumaminik kaanngartarpoq uumasorlu qumaarsussuaqarajunnerpaaq anaa aqqutigalugu qimattarlugu.

Tuttut qumaarsussuit qullugiaannik tunillanneqartarput, soorlu assersuutigalugu naasunik teriannissanit anarfigineqarsimasunik nerigaangamik. Qullugissat tuttup aqajaruani uummartarput, aqajaruisalu ameraasaat putusinnarlugit aavinut pisarlutik. Qullugiaq nukimmik pitsaasumik nassaaraangami manniusanngortarpoq. Qullugiarlu tassaniilersarpoq qumaarsussuaqarajunnerpaanik, – soorlu assersuutigalugu teriannissamik – utaqqilluni.

Qumaarsussuaqarajunnerpaap tuttup neqaa qullugiartalik nerigaangagu qumaarsussuup inuunerata ineriartornera naammatsittarpoq, taava qullugiaq uumasup neqitortartup erlaviiniilersarpoq qumaarsussuartullu inersimasunngorsinnaalersarluni. Taava suut tamarmik aallaqqaataanniit aallarteqqissinnaalersarput.

Titartagaq 2. Tuttuaqqap peqqissup uumap neqaa Taenia krabbei-ip manniusaanik ulikkaarpoq. (Assiliisoq: Mogens Torp & Henrik Hartmann)

Pinngortitaleriffik siusinnerusukkulli misissugassanik tamakkuninnga ilisimasaqarluartumut nassiussisimavoq: Dr. Terje D. Josefsen-imut Norgep Veterinærinstitutiani Tromsømiittumi sulisumut. Terje Josefsenip paasisimavaa, Qeqqata Sermrsuullu kommuniini tuttut qumaarsussuit qullugiaannik peqartartut. Ilanngullugulu oqaluttuarpoq, qumaarsussuit qullugiaat tuttoqarfinni nalinginnaasut, aamma Kalaallit Nunaata avataani.

Qumaarsussuit qumaarsussuillu qullugiaat qumaarsussuaqarajunnerpaani peroriartornerminnilu najortakkaminni nappaatinik pilersitsisanngillat (Titartagaq 2). Taamaattumik tuttut qimaarsussuit qullugiaannik peqaraluartulluunniit peqqissutut isikkoqartarput. Qullugissat inunnut tunillaasinnaanerannik ilisimasaqartoqanngilaq. Taamaakkaluartoq Terje Josefsenip inassutigaa, neqit qumaarsussuit qullugiaannik pillit ooqqissaarligilluunniit siaqqissaarneqartassasut.