Tunisassiat aavernit pisut Nunatsinniit anninneqarsinnaanerannik akuersissut atuutiinnarpoq Saqqummersinneqarfia 29.07.2015

Allattoq:  PeMi

Kalaallit Nunaanniit tunisassiat aavernit pisut avammut niuerutigineqarsinnaanerat ilumut Nunatsinni aaveqassutsimut akornusiinnginnera Pinngortitaleriffimmiit aasap ingerlanerani nutaamik naliliiffigineqarpoq. Naliliinerup inerneraa Namminersorlutik Oqartussat tunisassiat aavernit pisut Nunatta avataaneersunut niuerutigineqarsinnaanerannik akuersissuteqarsinnaatitaanerat ingerlaqqissinnaasoq.

Pinngortitaleriffik naliliivoq Nunatsinni aaffanniartarneq piujuartitsinermik tunngaveqarluni ingerlanneqartoq, tassa inerniliineq kingullermik 2009-mi naliliinermit allannguuteqanngilaq. 2008-mili naliliinermi inernerusoq akuersaartuusimanngilaq.

Ilisimatuussutsikkut tunngavilersugaasumik naliliineq pisortatigoortumik taaneqartarpoq ”Non Detrimental Finding” (NDF-naliliineq) imaluunniit allatut oqaatigineqartarluni piujuartitsinermik tunngaveqartuuneranik nalunaarut. Kalaallit Nunaat nunat tamalaat CITES-isumaqatigiissutaat (the Convention on International Trade in Endangered Species of Wild Fauna and Flora) naapertorlugu pisussaatitaavoq NDF-naliliinernik suliaqartartussaalluni. Isumaqatigiissut taanna naapertorlugu nunarsuarmi tamarmi niuerneq aqqutigalugu uumasut naasullu nujuartat nungutaanissamut ulorianartorsiortinnginneqarnissaat qulakkeerneqartussaavoq.

Pinngortitamut, Avatangiisinut Inatsisinillu Atortitsinermut Naalakkersuisoqarfik taannaavoq Pinngortitaleriffimmut NDF-naliliinernik ingerlaavartumik suliakkiissuteqartartuusoq.

Aarrit pillugit NDF-naliliineq uani atuarneqarsinnaavoq (tuluttuinnaq kalaallisullu).

Itinerusumik paasisaqarusunnermi attavigisassaq:

Miluumasunut Timmissanullu Immikkoortortaqarfimmi pisortaq Fernando Ugarte, oqarasuaat 361200 imal. mail: feug@natur.gl