*Required
*Required
*Required
*Required
*Required
*Required
*Required
*Required
Send
Thank you for your application!
 

Inughuit ilisimasaat aningaasanngorluni tunissutitut uterpoq

Assimi: Mamarut Kristiansenip tunissutigineqartoq Avanersuup Atuarfiata Siulersuisuisa siulittaasuannut Jørgen Qujaukitsumut tunniuppaa.

Allattoq:  PeMi

Suliniummi Siku-Inuit-Hila taamalu atuakkiamut ”The Meaning of Ice” (”Sikup pingaarutaa”)-imut tunuliaqutaallutik suleqatigiit Nunatsinneersut, Mamarut Kristiansen, Qaerngaaq Nielsen, Toku Oshima kiisalu Pinngortitaleriffimmi suliniutini assigiinngitsuni ilisimatusartartoq Lene Kielsen Holm 9. september 2015 Avanersuup atuarfianut aningaasanik 10.000 koruuningajannik tunissuteqarput.

Tunissutigineqartut tassaapput atuakkap ”The Meaning of Ice”-p tunisaaneranit sinneqartoorutit. Atuagaq saqqummersinneqarpoq International Polar Institute Press-imit 2013-imi University Press of New England, USA-miittup ataani saqqummersitsisartuusoq. Atuakkap piviusunngortinniarneqalerneraniilli pilersaarutaavoq tunisaaneranit sinneqartoorutit Avanersuarmiut, Alaskami Iñupiaat aammalu Canadami Nunavummiut meerartaannut inuusuttortaannullu utertinneqassasut, inuaqatigiinnguimmi taakkunaneersut atuakkap imarisaanut immersuisuummata. Atuakkami oqaluttuanerineqarpoq sumiiffinni pineqartuni inuit silap allanngoriartornerata kingunerisaanik maluginiagaannut tunngassutillit.

Ilisimasat ingerlateqqinneqarnissaat
”Tunissutigisatta siuaasatta qangarsuaaniilli avatangiisitsinnut tunngassuteqartunik ilisimasaannik kinguaatsinnut ingerlatitseqqinnissanut atorneqarnissaat neriuutigaarput. Neriuutigaarput aningaasat piniartut meeqqanut pisuussutit uumassusillit Issittumilu uumaniarsinnaanermut tunngassuteqartutigut ilinniartitsisarnissaannut atorneqarlutik tapertaalaarsinnaanissaat. Inuusaaserput siuaasatsinniit ukiut tusindilippassuit ingerlanerini ilisimasanik ingerlatitseqqiisarnernik toqqammaveqartoq sakkortusiartortumik silap pissusiata allanngoriartorneranit minnerunngitsumillu nunarsuarmioqatitsinnit sunnerneqariartornitsinnit tatineqaraluttuinnarpoq. Taamaammalliuna ilisimasat ingerlateqqinneqartarnissaat qulakkeerluarniassallugu pingaaruteqarluinnartuusoq”, suleqatigiissitami siuliani eqqaaneqartumi suleqataasoq piniartoq Mamarut Kristiansen Qaanaap Atuarfianut tunissuteqarnermi ilaatigut taama oqaaseqarpoq.

Atuarfiup Siulersuisuini ilaasortat ilaat, atuakkamullu ”The Meaning of Ice” –mut tunulequtaallutik suleqatigiinni sinniisut ilaat. Saamerlerpaavoq Lene Kielsen Holm

Inuit silap pissusianik uppernarsaanerat
Atuakkiarsuarmut ”The Meaning of Ice”-mut peqqutaasoq tassaavoq Naalagaaffiit Peqatigiit Issittumi silap pissusiata allanngornerata kingunerinik nalunaarusiarsuat 2005-imeersoq ACIA nalunaarusiamik taaneqartartoq. Tassani nalunaarusioqataapput nunarsuarmit tamarmit ilisimatusartartut 300-nit ikinnerunngitsut, silap pissusianik ilisimasallit, ilisimatusartartut allat kiisalu nunap inoqqaavinut tunngassuteqartuni immikkut ilisimasallit. Atuakkiarli ”The Meaning of Ice” ACIA nalunaarusiarsuarmut sanillersuunneqarsinnaasutut oqaatigineqarsinnaavoq, Inuit pissutsinik namminneerlutik isiginninnerannik uppernarsaammat.

Atuagarsuaq assiliartagissaaqisoq maannamut tuluttuinnaq saqqummernikuuvoq, tassanilu sikumut taaguutit 70-init ikinnerunngitsut atuarneqarsinnaapput. Pilersaarutaavoq kalaallisut, Inuppiattut Inuktitullu 2016-ip ingerlanerani saqqummersinneqarnissaa.

Paasissutissat:
Atuakkap ”The Meaning of Ice”-p piviusunngortinniarneqarnerani suliarineqarneranilu ilisimatuussutsikkut suliffeqarfiit suliniaqatigiiffiillu amerlasoorpassuit tapertaasimapput ilaatigut USA-mi National Science Foundation, Nunatsinni Alaskamilu ICC, Nunatsinni Silap Pissuanik Ilisimatusarfik Pinngortitaleriffillu, University of Coloradomi National Snow and Ice Data Centre, Nunavumi Arctic College, Alaskami North Slope Borough kiisalu IPY (International Polar Year). Illoqarfiit suliniummi peqataatitaqartut tassaapput Alaskami Barrow, Canadami Clyde River Nunatsinnilu Qaanaaq.

Itinerusumik paasisaqarusunnermi saaffigisassaq:
Pinngortitaleriffiup ataani Silap Pissuanik Ilisimatusarfeqarfimmi suliniutini ilisimatusartartoq Lene Kielsen Holm, oqarasuaat 361200 imal. mbl. 553358, mail: leho@natur.gl