Issittumi ilisimatusarnernut atatillugu ilinniaqqinnernut aningaasaliissutit agguaanneqarput Saqqummersinneqarfia 23.07.2015

Allattoq: PeMi

Kalaallit Nunaanni Ilisimatusarnikkut Siunnersuisooqatigiit ilisimatusartartutut ilinniaqqinnernut aningaasaliissutit 7,3 millioner koruunit ph.d-nngorniutissanut pingasunut aammalu post doc aningaasaliissummut ataatsimut agguaateqqammerpaat. Siunnersuisooqatigiit siulittaasuat Minik Rosing ilisimatitsivoq aningaasaliissutinik pissarsiniarneq ajornakusoortuusoq, qinnuteqartummi piukkunnaateqarluinnartut 16-it akornanni aningaasaliiffigineqartut toqqarneqarmata. Qinnuteqaatit imarisamikkut qaffasissumik inissisimanissaannik piumasaqaatit saniatigut ilisimatusartartutut suliniutissat Kalaallit Nunaanni piginnaasatigut qaffassaaqataanissaannik ilaqarnissaanik piumasaqaatitaqarpoq kiisalu danskit kalaallillu akornanni ilisimatusarnikkut suleqatigiinnerannik siuarsaaqataasussaallutik.

Aningaasaliissutit ilisimatusariaatsinut assigiinngitsunut agguarneqartut makkuupput:

Søren Lorenzen Post, aalisakkat immap ikerinnaasiortut saarullernat Nunatta imartaani siaruarsimanerat aammalu pissusaat pillugit ilisimatusaateqarniartoq. Ph.d-nngorniutissaq Pinngortitaleriffiup Danmarks Tekniske Universitetillu ataanni ingerlanneqassaaq.
Judithe Denbæk, kalaallisut oqaatsit oqaaseqatigiilioriaatsillu pinngortarnerisa oqaatsinik isumasiuinermut attuumassuteqarnerinik ilisimatusaateqarniartoq. Ph.d-nngorniutissaq Oqaasileriffiup Ilisimatusarfiullu ataanni ingerlanneqassaaq.
Majken Poulsen, ujaqqat Korundit (rubiinit) kemiskimik katitigaanneranni taamaalillunilu ujaqqatut erlinnartuutitut pitsaassusiannut pissutsit aalajangiisuusartut pillugit ilisimatusaateqarniartoq. Ph.d-nngorniutissaq De Nationale Geologiske Undersøgelser for Danmark og Grønland (GEUS) ataani ingerlanneqassaaq.
Dorte Søgaard Schrøder, silap pissusiata allanngoriartornerata kingunerisaanik Nunatta kangerluini sikuusuni kulstoffimik ”tigooraasarnerit” sunnerneqarnerannik ilisimatusaatigalugu postdoc-imik ingerlataqarniartoq. Ilisimatusaatissaq Kalaallit Nunaanni Silap Pissusianik Ilisimatusarfiup ataani ingerlanneqassaaq.

Pinngortitaleriffik aningaasaliissutinik ilaatigut Namminersorlutik Oqartussat ilisimatusarnernut aningaasalissutigisartagaannik (2,2 mio.kr) qallunaallu aningaasanut inatsisaatigoortumik Issittumi ilisimatusarnernut (5,1 mio.kr.) aningaasaliissutigisaannik aqutsisuuvoq.

Itinurusumik paasisaqarusunnermi saaffigisassaq:

Pinngortitaleriffiup pisortaa Klaus H. Nygaard oqarasuaat 361200 imal. klny@natur.gl