Nittartagaq nutaaq naalagaaffeqatigiit Issittumi ilisimatusarnerannik katersuiffiusoq Saqqummersinneqarfia 06.04.2015

Allattoq:  PeMi

ISAAFFik kalaallisut isertarfissuarmik isumaqarpoq. Tassalu nittartagaq nutaaq, kikkunnulluunnit issittumi ilisimatusarnissanik pilersaaruteqartunut, saniatigullu aamma isumassarsiat pillugit paarlaasseqatigiittarfittut atuerusuttunut aammalu ilinniartitsinermut, ilisimatusarnermut ilinniartitaanernullu iluaqusersueqataarusuttunut tamanut iluaqutaassaaq.

 Danmarkimi, Kalaallit Nunaanni Savalimmiunilu ilisimatusarfiit ilisimatusarnikkullu suliffeqarfiit Danmarkimilu sakkutooqarfik nittartakkap inerisarneqarnerani suleqatigiissimapput.

 “Issittumi avatangiisit ukiuni makkunani allanngoriartupiloorput, allanngoriartornerillu tamakku qanoq pitsaanerpaanik sillimaffigissanerigut ilisimajumallugu malunnaatilimmik ilisimatusaatigalugu misissuisoqartariaqarpoq. Nittartagaq nutaaq atorlugu ilisimasatsinnik paarlaasseqatigiilluarsinnaanerulissaagut naalagaaffeqatigiinnerullu iluani suleqatigiinnerput nukittorsarluarsinnaanerulissavarput, taamalu ataatsimoorluta silap pissusiata allanngoriartornera qanoq iliuuseqarfigisinnaanerulissallugu”, Ilinniartiaanermut Ilisimatusarnermullu ministeri Sofie Carsten Nielsen oqarpoq.

 Ukiuni makkunani Issittoq nunarsuarmioqatitsinniit alaatsinaanneqartupilussuuvoq. Silap pissusiata allanngoriartornerata kingunerisaanik periarfissanik nutaanik pilersoqartuarpoq Issittumilu inuuniarnikkut tunngaviusoq uumassuseqassutsip tamarmiusup ataqatigiinnera, pisuussuterpassuarnik pinngorartitsiviujuartoq, aamma nutaanik unammilligassaqalerporlusooq.

 Uulia, aatsitassat umiarsuartigullu angallannermi aqqutaasinnaalersussat nutaat Issittup politikikkut eqqumaffigineqarnerulerneranut peqqutaasunut ilaapput, nunarsuulli immikkoortuani atortulersuutitigut annikitsuinnarmik aaqqissuussivigineqarsimasumi ingerlatsiniarneq akisoqalunilu pisarioqaaq. Assartuinikkulli, asimi misissuisarfeqarnikkut atortuuteqarnikkullu issittumi iluaquteqarsinnaanissaq tamarmiusoq eqqarsaatigalugu ataqatigiissaarinissanik pisariaqartitsisoqarluinnarmat nittartagartaap iluaqutaallualersinnaassaa neriuutigineqarluinnarpoq.

 “ISAAFFIK ilisimatusartartut ataasiakkaat suliniutinut aallartinneqarsimasunut ataasiakkaanut malinnaanissaannut iluaqutaallunilu nammineq suliniutissaminik pilersaarusiornissaanut iluaqutaassaaq. Uagut immaqa naalagaafferannguugaluarpugut, naalagaaffeqatigiiffilli issittumi ilisimatusarnerup tungaatigut pissaaneqarnerpaanut ilaavoq, issittumilu ilisimatusarnerup tungaatigut siuttuujuartariaqarpugut”, Aarhus Universitetimi prodekan Kurt Nielsen, universitetit, oqartussaasut ilisimatusarnermillu suliffeqarfiit akimorlugit nittartakkamik pilersitsiniarlutik ilisimatusartartut, ataqatigiissaarisartut siunnersuisartullu immikkoortiterlutik suleqatigiiffiinut siulittaasuusimasoq oqarpoq.

 Issittumi nittartagartaaq uani takuuk: www.isaaffik.org

 Itinerusumik paasisaqarusunnermi saaffigisassat:

ISAAFFIK-mi ataqatigiissaarisoq Peter Schmidt Mikkelsen, Pinngortitaleriffik aamma Aarhus Universitet, pemi@natur.gl, oqaasuaat +45 3071 3950

 Aarhus Universitetimi prodekan, Kurt Nielsen, kni@au.dk, tlf. 4084 1780