Immikkuullarilaartunnguaq: Nunatta tuttuisa ilaanni miluuttoq nutaaq naviananngitsoq nassaarineqarpoq Saqqummersinneqarfia 01.03.2016

Asseq: Miluuttoq nutaaq taaguuserneqarsimavoq Eimeria tuttuii. Asseq: Christine Cuyler

Allattoq:  PeMi

Miluuttoq nutaaq Nuup eqqaani tuttut ilaanni nassaarineqarpoq. Miluuttoq uumassusillit ataasiinnarmik cellillit ilaqutariiussutsimikkullu ”Eimeriidae”-kkunnik taaguuteqartinneqartut ilagaat, ilisimatuussutsikkullu atertaatinneqarluni Eimeria tuttuii. Atsiunneqartoq kalaallisuumiit latiinerisuumiillu akuugaavoq, oqaatsitsinniillu oqaaseq tuttu aallaavigalugu.

Miluuttoq Nuup eqqaani kangerlummi Ameralimmi tuttut arnavissat akornanni nassaarineqarpoq, imaassinnaallunili kangerlunni allani tuttuni aamma nassaassaasimassasoq. Eimeria tuttuii naatsorsuutigineqarpoq naviananngitsoq, tassami tuttut inalugaanni anaannilu tamaallaat nassaarineqarsimammat aammalu timaata sinneranut siaruarsimanani.

Pinngortitaleriffimmeersoq Christine Cuyler allaaserinneqataalu University of Iceland-imeersoq Karl Skirnisson taakkuupput miluuttumik paasisamik nutaamik ilisimatuussutsikkut allaaserinnittarfimmi ”Parasitology Research”-imi allaaserinnillutik qanittukkut saqqummiussisuusut.

Ameralimmi tuttut Norgemeersunit tuttunik nujuitsunik akusaapput, taakkulu 1950-ikkut aallartilaarneranni Ameralimmut nunaligussaanikuullutik. Ilisimatusartartut taakkuninnga misissuigamik miluuttunik assigiinngitsunik marlunnik ilaqutariittunillu nassaarput. Aappaa tassaavoq Eimeria rangiferis, taanna Europami tuttuutigineqartuni nalinginnaasumik nassaassaasarpoq, aappaalu maani nunatsinni pinngortuusimasoq allaaserisarpullu E. tuttui uani oqaluttuannguami immikkuullarilaartunnguami allaaserilaarparput.