*Required
*Required
*Required
*Required
*Required
*Required
*Required
*Required
Send
Thank you for your application!
 

NAMMCO Nuummi ataatsimiimmat Kalaallit Nunaat nersorneqarpoq

Kalaallit Nunaanni Pinngortitaleriffik siorna 2015-imi arfernik kisitsisimanera pillugu nersualaarneqarpoq. Arfernik kisitsinerup inerneri NAMMCOp ilisimatuussutsikkut ataatsimiititaliaata misissoreerlugit akuersissutigai.

NAMMCOp (Atlantikup Avannaani Miluumasut pillugit Ataatsimiittartoqatigiit) ilisimatuussutsikkut ataatsimiititaliaata ukiumoortumik 23-ssaannik ataatsimiinnera Nuummi 4.-7. novembari 2016 pivoq, ataatsimiinnermut Pinngortitaleriffik tamatumuuna qaqqusisoralugu.

Ataatsimiinnermi Atlantikup Avannaani imaani uumasoqatigiinnik assigiinngitsunik peqassutsit soorlu, puiseqassutsip, aaveqassutsip arfeqassutsillu killiffii aamma kattuffinnik suleqateqarnerit kiisalu aalisarnerup aatsitassarsiornerullu imaani miluumasunut sunniutaat eqqartorneqartunut ilaapput. Ilisimatuussutsikkut ataatsimiitiliaq NAMMCO-mik siunnersuissartuuvoq Nuummilu ataatsimiinnermit nalunaarusiaq NAMMCOp ukiumoortumik nalunaarusiarisartagaanut ilanngunneqassaaq. Ukiumoortumik nalunaarusiaq NAMMCO aappaagu upernaakkut ukiumoortumik ataatsimeereersimalerpat saqqummiunneqassaaq. Pinngortitaleriffik 2015-imi arfernik kisitsinermi inernerusut, ataatsimiinnermi misissorneqarlutillu akuersissutigineqartut pillugit NAMMCOp ilisimatuussutsikkut ataatsimiititaliaanit nersualaarneqarpoq.

Ilisimatuut 20-t ataatsimeeqataasut nunani makkunani NAMMCO-mut ilaasortaasuneersuupput: Norge, Savalimmiut, Islandi aamma Kalaallit Nunaat. Ataatsimiinnermut peqataapputtaaq Canadamit, Ruslandimit Japanimillu alaatsinaatsitat NAMMCO-llu allattoqarfianeersut.

Ilisimatuussutsikkut ataatsimiititaliap nalunaarusiaa aappaagu upernaakkut NAMMCO-mit isummerfigineqareerpat arfernik kisitsisimanermi inernerit NAMMCOp atuagassiaani immikkut sammisatut saqqummiunneqarumaarput.

Attavigisassaq:

Pinngortitaleriffiup Miluumasunut Timmissallunullu Immikkoortortaani pisortaq Fernando Ugarte email:feug@natur.gl , oqarasuaat: 361200