*Required
*Required
*Required
*Required
*Required
*Required
*Required
*Required
Send
Thank you for your application!
 

Nunatta kujataani appat 2014-imi perlerlutik toqoraannarsimapput

Nunatta kujataani appat toqoraannarsimasorpassuit 2014-imi nassaarineqartut perlerlutik toqorarsimapput. Taamaappoq Danmarkimi DTU Veterinærinstituttet, Danmarks Tekniske Universitetimeersut Pinngortitaleriffimmeersullu suleqatigiillutik appanik toqoraannarsimasunik misissuinerannit inerniliussaq. Appat 2014-imi toqoraannarsimasut akornannit 45-t Danmarkimi misissugassanngortinneqarput. Misissuinernit pineqatunit inernerit qanittukkut ilisimatusartartut allaaserinnittarfianni saqqummersartumi AVIAN DISEASES-imi saqqummiunneqarput.

Misissuinerit qularnaatsumik takutippaat appat perlerlutik toqusimasut, kisiannili aamma Nunatsinni appat akornanni timmissat nualluutaannik, tassa virusinik H11N2 aamma H5N1 taaguuteqartinneqartunik, tunillatsissimasunik siullerpaamik nassaartoqarpoq. Taakkunanili timmissat nualluutaannik nappaateqalersimasut tuniluuppallaanngitsumik tunillanneqarsimapput, taamaammallu Pinngortitalerifimmi DTU-milu ilisimatusartartut arleqquteqartoqartariaqanngitsoq erseqqissaatigaat. Tassami timmissat nualluutaannik virusit appani nassaarineqartut nappaalanarujussuartuunngillat.

Timmissat nualluutaat aatsaat Kalaallit Nunaanni timmissat akornanni naammattoorneqanngilaq, tassami nualluut pineqartoq timmissat nujuartat akornanni naammattuugassaasarmat. DTU Veterinærinstituttimeersut siusinnerusukkullu nerlerit naajakkullu ilaasa anaanni virusimik taama ittumik nassaartarsimapput.

”Appat timmissat nualluutaannik tunillatsissimasut perulunnanngilluinnartumik virus-eqalersimapput, taakkulu inunnut tunillaassinnaanngillat. Aamma ilimagaarput timmissat nualluutaat qularnanngitsumik appani Nunatsinniittartuni pigineqareersimagunartoq, maannalu nalaatsornerinnakkut naammattuuisimagunarpugut”, Seniorforsker, Pinngortitaleriffimmi ilisimatusartartutut atorfeqartoq, Flemming Ravn Merkel nassuiaavoq.

Ilisimatusartartut isumaqarput appat toquinnarsimasut toqoraannannginnerminni saloreersimasinnaassasut, immaqa nerisassaalatsinermik peqquteqartumik. ”Immaqa ukiup anorersui aallartinnginnerannilu saloreersimasinnaapput, taamaattumillu akiuussutissaqarpallaarsimassanatik”, Flemming Ravn Merkel erseqqissaavoq.

Apparpassuit nunarsuatta kangiatungaaneersut aammalu kitaatungaaneersut Kalaallit Nunaata kitaata imartaani katersuuffeqartarput, ilimagineqarporlu taamaalinerani appat allat timmissat nualluutaannik tunillanneqarsimanissaat. Apparpassuit nunanit tamalaarpassuarneersut Nunatta kitaata imartaani ukiisarfeqarput.