*Required
*Required
*Required
*Required
*Required
*Required
*Required
*Required
Send
Thank you for your application!
 

Ukiumoortumik nalunaarut 2015

Pinngortitaleriffiup ukiumoortumik nalunaarutaa 2015 matumuuna saqqummerpoq.

Pinngortitaleriffimmut 2015 assigiinngitsunik pisoqarfiuvoq, pisorlu pingaarnerpaaq – ilami aamma Nunatsinnut tamarmut sunniuteqartussaq – pivoq Pinngortitaleriffiup ilassutissaa nutaaq sanaartorniarlugu qaartitserngaartoqarmat. Sanaartugassami tassani pinngortitalerinermik ilisimatusarfissaq Nunatsinnilu peqqissaanikkut ilisimatusarfeqarfissaq inissisimaveqassapput, sanaartugarlu 2017-imi piareerniarneqarpoq.

Sanaartukkamut aningaasaliisuupput aningaasaateqarfiit Aage V. Jensens Fonde-mut attuumassuteqartut, Aage V. Jensens Fondenilu amerlanerpaanik aningaasaliisuuvoq aammalu Maersk Oil Kalaallit Nunaat-lli (suleqataalu Tullow Oil aamma Nuna Oil) sanaartornissaq pillugu Kalaallit Nunaanni Namminersorlutik Oqartussanut isumaqatigiissut aqqutigalugu misissuisarfittassaanut aningaasaliisuullutik.

Pinngortitaleriffik aamma 2015-imi saarullinnut siunnersuinernut tunngassuteqartutigut immikkut ittumik angusaqarpoq. Tassami ilisimatusartartut Pinngortitaleriffimmeersut Aarhusillu Universitetianeersullu saarulleqatigiiaanik Nunatta imartaaniittunik immikkoortitsisinnaanngorput. Taamaalilluni saarulleqatigiiaat sisamanut immikkoortinneqarput, saarullinnullu tunngatillugu siunnersueriaaseq sukumiinerulerpoq pitsanngoriartinneqarlunilu. Saarulleqatigiiaat taama immikkoortinneqarsinnaalerput Pinngortitaleriffiup immikkuullarilluinnartumik saarulliit siunnaanik katersaatai 1908-miit aallartilluni katersorneqalersimasut aammalu paasissutissaatit ukiorpanngortuni katersaatit atorlugit.

Pinngoritaleriffiup ukiorpanngortuni nanulerisua, seniorforsker Erik W. Born, nannut pillugit ukiut 40-t sinnerlugit ilisimatusarsimanini 2015-imi ataqqinaaserneqarluni nersorneqaatigaa. Soorunami taama nersorniarneqarnera inuttaanut tunngatinneqaraluartoq peqatigitillugu Pinngortitaleriffiup nannut pillugit ilisimatusarnernik suliaanik aammalu Nunatta nannut pillugit naalakkersuinikkut aqutsinikkullu angusarisimasaannik nersornaasiineq aammattaaq tunngatinneqarpoq.

Nunarsuarmi nunat nanoqarfiusut nersornaasiisarnermik pilersitsisimapput, tunniunneqartarlunilu nannut piujuartinneqarnissaat anguniarlugu iliuuserineqarsimasunut nersorinnissutitut.

Tamakkununnga aammalu Pinngortitaleriffiup angusaanut allanut tunngassutillit ukiumoortumik nalunaarummi atuarneqarsinnaapput.

Atuarluarnissannik kissaallutit.

Klaus Nygaard

Pisortaaneq