USA-p Nunanut allanut Ministeria John Kerry Ilulissani silasiorpoq Saqqummersinneqarfia 26.06.2016
Allattoq: PeMi
Issittoq silap pissusiata allanngoriartorneranit sunniutaanut mianernartuuvoq, tassami Issittumi kissatsikkiartorneq nunarsuup sinnerani kissatsikkiartornermut sanilliullugu marloriaammik sakkortuneraaq.
Tamanna USAp nunanut allanut ministeriata nammineq isiminik takuaa, professor Søren Rysgard-ip Ilulissat Kangerluanni allannguutit nunarsuarmi nunanut allanut ministerit sunniuteqarnersaannut nassuiaatigimmagit.
Ilaatigut nunatsinni Naalakkersuisut Siulittaasuat, Kim Kielsen, Danmarkimi Nunanut allanut Ministeri, Kristian Jensen, nunatsinnilu Nunanut allanut Naalakkersuisoq, Vittus Qujaukitsoq, ilagalugit Søren Rysgaard issittumi pissutsinik ilisimasarpassuarminik saqqummiussinissaminut periarfissinneqarpoq, tamakkorpiarnummi tunngassutillit ukiuni 20-ni kingullerni ilisimatusaatigereeramigit.
“John Kerry nunarsuarmi inuit sunniuteqarnerpaat ilagaat. Nuannaarutigaara silap pissusiata allanngoriartorneranut tunngassutillit pingaaruteqartutut isigimmagit oqariartuutigineqartullu nunarsuup sinneranut ingerlateqqissinnaassammagit,” Søren Rysgaard oqarpoq.
USA Kinalu kuldioxid-imik (CO2) nunarsuarmi aniatitsinerpaajupput EU, India, Rusland, Japan Canadalu malitsigalugit.
John Kerryp Ilulissat Kangerluini angalaalaarnermini pissarsiaqarpasivippoq.
“Nalitsinni unammilligassat annerpaat ilaat tassaavoq, peqqarniisaarniarnermik akiuiniarnerup saniatigut silap pissusiata allanngoriartornerata nunarsuarmut tamarmut sunniutaanut akiuinissaq. Tikeraarnera paasisaqarfigeqaara, naak tamakkununnga tunngasut ukiut 25-t sinnerlugit sammisarereernikuugaluarlugit”, John Kerry qallunaat umiarsuaata nakkutilliissutip Thetis-ip, politikerinik ilisimatusartartunillu Ilulissat Kangerluannut angallassisuusup, qaavaniilluni oqarpoq.
Silap pissusiata allanngoriartornerata kingunerinik nunarsuaq tamarmi sunnersimaneqarpoq. Ilaatigut Issittup imartaata sikua annertoorujussuaq aassimalereerpoq. Tamatuma ilaatigut kingunerisimavaa nordvest- aamma nordøstpassagep aasaanerani umiarsuarnit angallavigineqarsinnaanngornerat, tamannalu isumannaallisaanikkut unammilligassarpassuarnik malitseqartitsivoq, tamakkulu Issittumi nunat USA-llu eqqissisimasumik isumaqatigiinniarnikkut aaqqiiviginiartariaqarpaat.
