Nuup Kangerluata kulturip tungaatigut atornera pillugu p.hd. nutaaq Saqqummersinneqarfia 04.07.2017

Ilisimatusartoq Ann Eileen Lennert Ilisimatusarfimmeersoq Pinngortitaleriffimmeersorlu ulloq 27/6 2017 Nuup Kangerluata ukiuni tusindilinni kulturikkut atorneqarnera pillugu ilisimatusaatini saqqummiuppaa. Ilisimatusaatitut saqqummiussaq ”A Millennium of Changing Environment in Godthåbsfjord, West Greenland – Bridging cultures of knowledge” (”Nuup Kangerluani, Kalaallit Nunaata Kitaani – ukiuni tusindilinni avatangiisitigut allanngorneq – ilisimasat pillugit kulturit assigiinngitsut attaveqaasernerat”)-mik qulequtaqarpoq.

Ann Eileen Lennert aalisartut piniartullu marluk, Angunnguaq Josefsen aamma Vittus Nielsen (Kapisilinneersoq aamma Qoorngumeersoq), qanimut suleqatigalugit ilisimatusaatini ukiuni pingasuni suliarisimavaa, kisianni aamma aalisartut piniartullu Sisimiuneersut, Tasiilameersut, Saattuneersut Kujataaneersullu suleqatigisimavai. Piniartut najukkaminnut tunngasunik ukiuni hundredilinni Ilisimatusarfimmi Pinngortitaleriffimmilu ilisimatusaatigineqartunik ilisimasaqarput. Ilisimatusaatitut saqqummiussinermut atatillugu allaatigisat arfineq-pingasut ilisimatusaataasut saqqummiunneqarsimapput.

Ann Eileen Lennert Ilisimatusarnermi kulturimik inuiaqatigiilerinermillu kandidatiugami ilisimatusaataa Nuup Kangerluata kulturip tungaatigut atorneqarnera pillugu pingaarnertut imaqarpoq. Kisianni ilisimatusaatigineqartoq ukiuni tusindilinni atuinermik imaqarpoq, taamaasilluni avatangiisit pillugit pinngortitalerinermi ilisimatuussutsikku silaannaallu allanngoriartornera pillugu ilisimatusaatitut saqqummiunneqartumi ilanngunneqarsimapput.

Ilutigitillugu ilisimatusaatitut saqqummiunneqartumi isumalluutit atorneqarnerat allaatigineqarpoq – isumalluutit uumassusillit uumassuseqanngitsullu – tamatumani inuit oqaluttuarisaanerat, attakorsiorneq, oqaluttuarisaaneq, uumassusilerineq, silaannaq, inuiaqatigiit aningaasaqarnerat ilaatigullu geologi ilisimatusaatitut allaatigisami ilanngunneqarsimapput. Ilisimatusaatit taakkua Nuup Kangerluani kulturip tungaatigut attassiinnarnermut tunngatillugu najugallit ilisimasaannik akoqarput.