Pinngortitaleriffimi misissuisuuneq stipendiatimik angisuumik tunineqartoq Saqqummersinneqarfia 06.03.2017
Pinngortitaleriffimmi USA-milu Washington Universitymi misissuisuuneq Kristin Laidre ilisimatusarnerminut atugassaminik, ukiuni pingasuni atugassatut naatsorsuussanik 1.mio kr.-inik aningaasartalimmik USA-mi PEW Marine Fellowshipimit stipendiatimik tunineqarpoq.
Aningaasaliissutit Kristin Laidrep ilisimatusaatigalugu suliaminut marlunnut, tassalu nannut Issittumi tamarmi qanoq issusiannik misissuinissaminut aappaattullu, Kalaallit Nunaanni sumiiffinni nanoqarfiusuni piniartut nannunniartartut inuunerat pillugu assiliartalersorlugu allaaserinninnissaminut atorniarpai. Piniartut pillugit assiliartalimmik allaaserisani atorlugu ilimatusartartut sulinerminni piniartunik nannunniartartunik suleqateqarnerisa pingaaruteqassusiat attatiinnarneqarnissaallu ersersikkusuppaa.
Kristin Laidrep suleqataasalu suliaq Tunumi inoqarfinni – Kalaallit Nunaata sinnerani inoqarfinnut allanut sanilliullutik nannunit qaninngoorneqarnerusartuni – aallartissavaat.
– Piniartunik apersuinissanni suleqatigissavakka assiliisartoq Finlandimiu Tiina Itkonen aamma amerikamiu allaaserinnittartoq Susan McGrath. Apersuinitsinni soorunami kalaallimik tuluttuumiit kalaallisuumut nutserisinnaasumik oqalutseqassaagut. Illoqarfinni nunaqarfinnilu piniartut ilaqutaallu inuuniarnerminnut pingaarutilimmik nannunniartartut tikeraassavagut. Silap pissusiata allanngoriartornerata piniartukkormiut inuuniarnerannut avatangiisaannullu qanoq sunniuteqarnera piniartunut oqaluttuaritikkusupparput. Piniartunik apersuilluni allaaserisat assilisallu Kalaallit Nunaanni, USA-mi Finlandimilu tamanut saqqummersinneqarnissaat, suliniutillu aappaata – nannut Issittumi tamarmi qanoq issusiannik misissuinerup inernerata atuagassiani ilisimatuussutsimik sammisaqartuni saqqummersinneqarnissaa siunertaavoq, Kristin Laidre oqarpoq.
Tasiilami nunaqarfittaanilu piniartunik apersuillunilu assileeqattaarnerit qaammammi uani aallartissapput. Tamatuma kingorna Kristin Laidrep suleqataasalu Qaanaaq Ittoqqortoormiit taakkualu nunaqarfii aamma tikinniassamaarpaat.
Annertunerusumik paasisaqarusunnermi attavigisassaq:
Kristin Laidre: +299 548513 email klaidre@uw.edu
