Qimusseriarsuarmi 2014-imi 2015-imilu misileraalluni ineriartortitsiniarlunilu aalisarnernit nalunaarusiaq saqqummerpoq Saqqummersinneqarfia 28.02.2017

2014-imi kalinnerit katillugit 548-t pisallu tamakkerlugit 1.407 tonsit. 2015-imi misissuinerni kalinnerit 580-inut amerlineqarput, pisallu katillugit 1.594 tonsiullutik.

Qimusseriarsuarmi 2014-imi 2015-imilu nalunaaquttap akunneranut raajartarineqartartut kitaata sinnerani raajarniarfiusartuni pisaasartunut sanilliullugit ikinnerupput. Taamaakkaluartorli taavani raajartarineqartartut sinerissap sinnerani raajartarineqartartunit anginerupput. Taavani raajaqassutsip annertussusia biologinit maannaagallartoq ilisimaneqanngilaq.

Taama Qimusseriarsuarmi 2014-imi 2015-imilu misileraalluni ineriartortitsiniarlunilu raajarniarnernit nalunaarusiami inernerusut ilaat takutitsipput. Nalunaarusiaq taanna danskisuinnaq allagaasoq qulequtaqartorlu ”Forsøgs- og udviklingsfiskeri efter rejer i Melville Bugt 2014 og 2015” maanna Pinngortitaleriffiup nittartagaani atuarneqarsinnaalerpoq.

Royal Greenlandip kilisaataatai Akamalik (asseq qulleq) Qaqqatsiarlu (assimiittoq) Qimusseriarsuarmi 2014-imi 2015-imilu misileraalluni raajarniarnermi peqataapput. Asseq: Royal Greenland

Qimussseriarsuarmi misileraalluni 2014-imi 2015-imilu raajarniarnermi kilisaatit raajarniutit arfineq pingasut misileraalluni raajarniaqataapput.

Kilisaatit misileraaqataasut tamarmik pisanik nalunaarsuutinut ukiuni tulleriinni tamakkiilluinnartumik pisarisartakkaminnik nalunaarsuisarsimapput. Peqatigisaanillu pisarisuukkaminnik tamakkiisumik nalunaarsuisarsimallutik. Aalisakkat assigiinngitsut 69-it pisarisoorneqarsimapput, taakkunanngalu amerlanerpaarpaajusarsimapput eqalugaasat. Tassami pisarisuukkat 72 %-ii eqalugaasaasarsimammata. Pisarisoorneqarsimasut allat pissanganartut suusismaneri nalunaarusiami atuarneqarsinnaavoq.

Qimusseriarsuarmi misileraalluni raajarniarsimanerit kilisaatersornermik inuussutissarsiuteqartut kissaateqarnerat naapertorlugu ingerlanneqarsimapput. Tassami kilisaatersorlutik raajarniartartut Nunaata imartaani raajarniarfigisartakkamik avannamut Qimusseriarsuup imartaa ilanngullugu annertusineqarnissaanik kissaateqarmata.