*Required
*Required
*Required
*Required
*Required
*Required
*Required
*Required
Send
Thank you for your application!
 

Pinngortitaleriffiup illutaasa ilaqqinneqarnerisigut ilinniartitaanerit ilisimatusarnerillu malunnaatilissuarmik siuariarfiussapput

Kalaallit Nunarput Pinngortitamik Ilisimatusarfiup aammalu Peqqissaanermik Ilisimatusarfiup illutaanik nutaamik ullumi pisortatigoortumik atoqqaartitsinikkut pisuunnguuteqarpoq. Taamaalilluni ilisimatusarnermi atortunik nutaaliaalluinnartunik aamma pisuunnguuteqarluta.

Illorsuaq nutaaq 1.500 kvadratmeterinik angissuseqarpoq, ininik ilinniartitsiffiusartussanik, misissuisarfinnik, inunnik misissuisarfinnik, tikeraanut inissianik arfinilinnik mikisunik inunnullu 24-nut naatsorsuussanik allaffilersugaalluni. Misissuisarfiit anngajaarsuit marluk atortorissaarluinnartut Pinngortitamik Ilisimatusarfimmi ilinniartitsiffiusartussatut atorneqassapput, aammalu init ilinniartitsiffiusartussat attaveqaasersornermi nutaaliaalluinnartunik atortulersugaanertik peqqutigalugu nunarsuarmit sumiiffinnit tamaniit – aamma nunatsinniit nunanut allanut – toqqaannartumik ilinniartitsisoqarsinnaasassaaq, naak ilinniartut Nuummiiginnaraluartut. Illorsuaq isersimaffigalugu qaamasoq, nuannersunik nipigissagaalluartunik initalik kusanartunillu pequsersugaasoq ilinniarfigilissallugu suliffigissallugulu kajuminnarluinnartuuvoq

Pinngortitaleriffiup siulersuisuini siulittaasoq Gert Mulvad illorsuartaarsuup ilinniartitsiffittut initaani tusarnaaqataavoq. Asseq: GN

Pinngortitamik Ilisimatusarfik Pinngortitaleriffiup, Ilisimatusarfiup, Qallunaat Nunaannilu ilisimatusarfeqarfiit arlallit suleqatigalugit ingerlanneqarpoq, qulakkiigassaraalu biologinngornianik Issittumi pissutsinik ilisalinnik suli amerlanerusunik ilinniagartuunik naammassititsisarnissat. Peqqissutsimik Ilisimartusarfik illutaqalernermigut issittumi peqqissutsimik ilisimatusarnernik annertusaasinnaalissaaq Kalaallit Nunaannullu attuumassuteqarnerulersitsilluni. Suliniutigineqartutigut marlutsigut Kalaallit Nunaanni ilinniartitaanerit, ilisimasaqassuseq aammalu piginnaanngorsaasarnerit qaffassaavigineqassapput, taa-maalilluni inuiaqatigiinnik nammineernerujartortitsiniarnermik anguniagaq ikorfartorneqassalluni.

Aamma illorsuup nutaap pilersinneqarneragut ilisimatusarnernik suliffeqarfiit Pinngortitaleriffiup Ilisimatusarfiullu eqqaanni katersorneqarnissaannik anguniagaqarnermut qanillisaaneruvoq, peqatigisaanillu ilisimatusarnerit ilinniartitaanerillu assigiinngitsut akimorlugit ingerlatsiniarnernut naapertuulluinnartumik periarfissiisoqarluni. Taamatut eqiteriniarneq aamma nunarsuup issittortaani ilisimatusarnerit Nuummi “Issittumi ilisimatusarnerit eqiteruffiat”-nik pilersitsiniarnermut tulluulluinnarpoq. Eqiteruffimmik pilersitsiniarnermi anguniagaavoq nunarsuarmioqatigiit ilisimatusartartuisa nunatsinnukartarnerunissaannik kajumilersitsinissaq aammalu nunarsuarmioqatigiit Kalaallit Nunaanni ilisimatusaatigisartagaasa nunatsinnut iluaqutaanerulersinnissaannik qulakkeerinninnissaq.

Illorsuaq atulersoq Kalaallit Nunaanni suliffeqarfinnit sananeqarpoq, Illussanik titartaasarfik TNT Nuuk siunnersortaalluni, Permagreen sanaartortuulluni Pinngortitaleriffillu sanatitsisuulluni. Illorsuaq tamarmi sananeqarluni atortuilu tamakkivillugit 55 mio. missaanni akeqarpoq. Illorsuup sananeqarnissaanut aningaasalliisuupput Aningaasaateqarfiit Aage V. Jensens Fonde, Karen Elise Jensens Fond, Jelling Founda-tion, NOJ-Fonden kiisalu Holkegaardfonden. Aningaasaateqarfinnit aningaasaliisut tamarmik sanasumut namminersortuusimasumut Aage V. Jensenimut attuumassuteqarput. Aningaasaliisut allat Maersk Oil Kalaallit Nunaat (suleqataasullu Tullow Oil aamma Nunaoil) Namminersorlutik Oqartussanik isumaqatigiis-sutigisartik aqqutigalugu aningaasaliissuteqarnermikkut misissuisarfiit piviusunngorsinnaasimanerinik qulakkeerinnittuusimapput.

Aningaasaateqarfiup Aage V. Jensen Charity Foundationip siulittaasua Mette Fabricius Skovip illorsuup atoqqaartinneqarnerani aningaasaliisimasut allattorsimaffiat iikkamut nivinngarpaa. Sanianiippoq Aage V. Jensenip erngutaa Thomas Jensen erngutaqqiutaalu Walther isiginnaartuuvoq. Asseq: GN

 

Itinerusumik paasisaqarusunnermi saaffigisassaq:

Pingortitaleriffiup pisortaa Klaus Nygaard, oqarasuaat 361200 imal. mail: nygaard@natur.gl