Umiarsuarmik ilisimatuussutsikkut misissuummik pisaarnissaq ulapputigineqarpoq Saqqummersinneqarfia 24.08.2018
Naalakkersuisut umiarsuarmik imaani ilisimatuussutsikkut misissuutissamik 200 millioner koruuninik nalilimmik aningaasaliissuteqarnisssamik Inatsisartut Aningaasaqarnermut Akileraartarnermullu ataatsimiititaliaanut innersuussuteqarnerat ataatsimiititaliamit akuerineqarmat pisoq pingaartuuvoq immikkuullarissumillu aaliangernerulluni.
”Naalakkersuinikkkut aaliangerneq takorluuisinnaassuseqarluarnermik kiisalu siunissamut alimasissumut isiginiarsinnaassuseqarnermik takutitsineruvoq, Kalaallit Nunatsinnimi inuussutissarsiutit pingaarnerpaata – aalisarnerup – piujuartitsiniarnermik ilisimatuussutsikkullu tunngaveqartumik ineriartortinneqarnissaanik qulakkeerinninniartuummat. Nutaarluinnarmut ikaarsaalerpugullusooq, tassami misissuut nutaaq atuleriarpat aalisakkanik immap ikeraniittartunik, imaanit isumalluutigisatta nutaartaannik, ilisimatuussutsikkut misissuisoqarsinnaalissaaq”, Pinngortitaleriffiup siulersuisuini siulittaasoq Gert Mulvad oqarpoq.
Siunissaq qularnaarniarlugu aaliangerneq
Pinngortitaleriffiup misissuutitaassaata misissuutitoqaq immap naqqasiornermi kilisaataasoq ”Pâmiut” taarsissavaa, upernaaq ukiut 47-t siullermik KGH-p kilisaataatut ukiullu kingulliit 27-t ilisimatuussutsikkut imaani misissuisarnerni atorneqarsimalluni pisoqalivallaarluni atorneqarunnaartoq. Kilisaataasimasoq ”Pâmiut” atorlugu misissuisarnerpassuarni avataani raajat, qalerallit saarulliillu pillugit biologit siunnersuisarnerini tunngaviusartut paasissutissat pinngitsoorneqarsinnaanngitsut ukiorpassuit ingerlanerini pissarsiarineqarnikuupput. Misissuisarnerit pineqartut ukiut ingerlanerini utikattumik sanilliunneqarsinnaasunillu misissuisarnerupput, ukiorlu ataasiinnarluunniit misissuinngitsoortoqaraluarpat inuiaqatigiit ingerlatitaanerannut kinguneqartitserujussuarsinnaapput. Taamaammat misissuutitoqaq atorsinnaajunnaarmat aaqqiissutissamik siunissamut ungasissumut attanneqarsinnaasumik ujartuigasuartoqarpoq. Periarfissat upernaap ingerlanerani misissorluarneqarput, kilisaammik atornikumik, imaluunniit umiarsuarmik pilersuutaasimasumik atornikumik allanngortiterinikkut naggataagullu nutaamik umiarsuarmik misissuutiliortoqaraluarpat iluaqutissartai akornutissartaalu nalunaarusiortarnertigut nalilersuiffigineqarput. Nalilersuilluarnerit aallaavigalugit Pinngortitaleriffiup siulersuisui erseqqeqqissaartumik innersuussuteqarput, tassalu umiarsuaq misissuutissaq nutaarluinnaq suliassarititaasut aningaasaqarnerlu eqqarsaatigalugit kiisalu attartuumillusooq aaliangerussappat pisariaqartoq. Kingorna naalakkersuinikkut tapersiisoqarnissaanik anguniagaqarluni sulineq aatsaat taamak sukkatigisumik anguneqarpoq, taamaalilluni umiarsuarmik nutaamik sanasoqarnissaanik suliariumannittussarsiuussinerit 2018-imi ingerlanneqarsinnaalerlutik. Umiarsuup imaani pisuussutinik misissuutissap 2020-p naajartornerani piareerneqarnissaa naatsorsuutigineqarpoq.
Pisuussutit nutaat suliassat nutaat
Pinngortitaleriffiup suliassaqarfigisai ukiuni kingullerni amerleriarnikuupput aalisakkat immap ikeraniittartut, soorlu avaleraasartuut, saarullernat ammassaallu misissuiffigineqartalernikuummata. Tamakkuninnga misissuinissat misissuut ”Pâmiut”-mik pisinnaasarsimanngillat, taanna immap naqqasiortunik taamaallaat misissuutaammat. Misissuutissap nutaap aalisakkat immap naqqaniittartut ikeraniittartullu tamaasa misissuiffigisalertussaavai. Taamaalilluni aningaasanik atorluaanerusoqalissaaq, tassami aalisakkat immap ikeraniittartut misissuiffiginiarlugit misissuummik nunanit allaneersumik Pinngortitaleriffik attartortariaqartarpoq – uanili pingaarnerpaavoq aalisakkanik immap ikeraniittartunik misissuisarnerit siunissamissaaq assigiinnissaat sanilliunneqarsinnaanissaallu.
Umiarsuarmik imaani misissuutitaarnissamik aaliangerneq oqaatigineqarsinnaavoq inissaminiittorlusooq, tassami taamani Namminersornerullutik Oqartussat Kalaallit Nunaanni aalisakkanik misissuisarnerit namminneerlutik akisussaaffigilerusummatigit; taamalumi pisoqarpoq ukiut 30-t matuma siorna. Tassunga atatillugu naalakkersuinikkut aaliangertoqarpoq avataani aalisakkanik misissuisarnernut aningaasaliissutaasartut qaffanneqartariaqartut aammalu umiarsuarmik misissuutissamik pisaartoqartariaqartoq. Taamanerniilli misissuisarnerit peqqutaallutik aalisakkatigut pisssuussutinik uumassusilinnik iluaquteqarneq ilisimatuussutsikkut piujuartitsiniarnermillu tunngaveqartumik ingerlanneqarnissaannut tunngavissiipput, pingaartumik raajat qalerallillu eqqarsaatigalugit. Taakkumi inuiaqatigiittut aningaasaqarnitsinnut aaliangiisuulluinnartumik pingaaruteqartuupput, ullumi allaat MSC meqqilerneqarsimalerlutik.
Pinngortitaleriffik umiarsuarmik ilisimatuussutsikkut mississuummik allamik ingerlassaqarpoq, tassa ”Sanna”. Taanna sinerissap qanittuini aalisakkanik misissuutitut atorneqartarpoq, 2012-imi misissuutitoqqamut ”Adolf Jensen”-imut taartaalluni.
”Namminersorlutik Oqartussat umiarsuarnut misissuutissanut aningaasaliisarnermikkut Pinngortitaleriffiup illutaasa avataaniit aningaasaliiffigineqarlutik sananeqartarnerannut tapertaalluarput. Taamaalilluni Kalaallit Nunaat ilisimatusarnikkut atortulersuutinik imaani nunamilu ullutsinnut naleqquttunik pigisaqarnermigut ilisimatusarnikkut patajaatsumik inisseqqavoq. Tamanna Kalaallit Nunaannut imminut napatinniartumut tapertaavoq pingaartoq”, Gert Mulvad naggasiivoq.
Itinerusumik paasisaqarusunnermi saaffigisassaq:
Pisortaaneq Klaus Nygaard, nygaard@natur.gl imal. oqarasuaat 361200.
