Ilisimatuussutsikkut misissuut umiarsuaq R/V Pâmiut atorunnaarneqarpoq Saqqummersinneqarfia 15.03.2018
Pinngortitaleriffiup ilisimatuussutsikkut misissuutaa umiarsuaq R/V Pâmiut ingerlaannaq atuutitinneqalersumik aaliangiiffigineqarluni atorunnaarneqarpoq. Umiarsuaq kalaallinut inuiaqatigiinnut ukiuni 50-ini sullissilluareerluni, taakkunannga Pinngortitaleriffiup imaani misissuutitut ukiuni 25-ani atoreerlugu unitsinneqarpoq. Taama Pinngortitaleriffiup siulersuisui pisortaqatigiivilu aaliangerput umiarsuup isumannaatsuunissaanik ilisimasallit nalilersuereernerisa annertusisamillu misissuereernerisa kingorna. Naalakkersuisut pisumik ilisimatinneqareerput.
Umiarsuup naliliiffifigineqarluni misissuiffigineqarnerani kingullermi paasineqarpoq ilisimatuussutsikkut imaani misissuutitut atoqqissappat allatut ajornartumik annertuumik akisuupilussuarmillu iluarsartuuteqqaarneqassasoq. Tassungalu ilanngunneqassaaq iluarsartuuteqqinneqarnerani suut allarpassuit aningaasartuutaasussatut naatsorsuutaasimanngitsut puttussuutilernissaat ilimanarluinnassammat. Taamaammat Pinngortitaleriffimmi pisortaqatigiit siulersuisullu naliliipput umiarsuup misissuutip aserfallatsaalineqaqqinnissaa imminut akilersinnaanavianngitsoq aammalu Kalaallit Nunaata imartaani aalisakkanik misissuutitut atorsinnaajunnaartoq.
Aalisakkanik misissuutip Pâmiut inuttaasalu pikkorilluinnartut misilittagartuullu nunatsinni inuussutissarsiutit pingaarnerpaartaannik aalisagaqassutsinik – pingaartumik raajanik, saarullinnik qaleralinnillu – ukiumoortumik missuisarnerit pingaaruteqarluinnartut ingerlattarsimavaat. Misissuisarnerit taamaattut ingerlaannarnissaat pingaaruteqartupilussuuvoq, tassami taamatut utikattumik ukiorpassuarni ukiumut misissuinngitsoortoqarani misissuisarnerit sivitsoriartornerani nalitusiartortarmata Kalaallit Nunaannullu ilisimatusartarnerit eqqarsaatigalugit tunngaviusumik pingaaruteqartupilussuullutik.
Pinngortítaleriffimmi pisortaqatigiit Pâmiut taarterisinnaasaanik ukiuni arlaqalersuni ujartuisimapput, maannamut suli iluatsinngitsumik. Taartissaanik ujarlernermi Namminersorlutik Oqartussat maanna ilanngullutik ilungersoqataalernikuupput. Peqatigitillugulu aalisagaqassutsinik assigiinngitsunik misissuisarnerit pingaarutilissuit ”putoqalernissaat” pinngitsoortinniarlugu misissuisarnerit ingerlatiinnarniarlugit ilungersorluni sulisoqarluni.
Itinerusumik paasisaqarusunnermi saaffigisassaq:
Pisortaaneq Klaus Nygaard, oqarasuaat: 361200; imal.: mail nygaard@natur.gl
