Ilisarnaatitaarluni – SPI-p ukiut qulit tullii aallartilerpai Saqqummersinneqarfia 16.01.2019
Silap Pissusaa pillugu Ilisimatusarfiup 2019 aallartippaa nutaamik ilisarnaatitaarluni.
Kalaallit Nunaanni Silap pissusaa pillugu ilisimatusarfik, SPI, nukittooq
Ukiut qulit kingulliit ingerlaneranni SPI Kalaallit Nunaanni ilisimatusarnerup silarsuaanut inuiaqatigiinnullu akuliulluarsimavoq. Ilisarnaatitaarnitsigut nutaamik najoqqutassatut siunertartaarnerput takussutissaqartikkusupparput., ilisimatusarfitsinni suliat ingerlanneqartut najukkatsinnut ,inuiaqatigiinnullu tulluuttumik iluaqutaanissaat anguniagarigatsigu.
Malene Simon, SPI-p aqutsisua oqarpoq: ”Suliffeqarfipput ukiunut tulliuttunut qulinut ikaarsaalerpoq. Ukiunilu qulini ineriartorsimaqaaq, inuiaqatigiinnullu kalaallinut akuliusimanerulersimalluni. Taamaattumik nutaamik ilisarnaatitaarnitsigut avammut oqariartuutigaarput, kalaallit erfalasuannut pinngortitamullu avatangiiserisatsinnut attuumassuteqartumik suliaqarluta.”
“SPI nunanik tamalaanik suleqateqarpoq kalaallit inuiaqatigiit qitiutillugit ingerlatsigatta ilisarnaatitaarput tuluttut kalaallisullu avammut saqqummiupparput”, Malene Simon oqarpoq.
Ilisarnaatit avatangiisillu isumaqarluartut takussaapput
Ilisarnaatitaatsinni kalaallit nunaata pinngortitaa SPI’p suliassaqarfigisaa ersippoq. Trekantit qaqqanut ilulissanullu ilisarnaataapput qilammik tungutsorimmik tunuliaqutallit. Ammaloqisaap affaani imaq sikulik sikoqanngitsorluunniit ersippoq. Ilisarnaat kalaallit erfalasuannut eqqaanarpoq takutikkusukkatsigu SPI, Kalaallit Nunaata silap pissusaa pillugu ilisimatusarfigigaa, suliarineqartullu tamarmik kalaallinut inuiaqatiginnut naleqartussanngorlugit aqqissuussaasarmata.
Ilisarnaat suliffeqarfimmik kalaallinik pigineqartumik Let It Snow ApS-mit suliarineqarpoq.
