Lene Ilisimatusarnermut Siunnersuisoqatigiinniilerpoq Saqqummersinneqarfia 21.01.2019
Pinngortitaleriffik Silallu Pissusaanik Ilisimatusarfik, SPI, sinnerlugit nuannaarutigalugu tanngassimaarutigalugulu ilisimatitsissutigissavarput Lene Kielsen Holm SIP-mi atorfeqartoq Naalakkersuisuniit Nunatsinni Ilisimatusarneq pillugu ataatsimiitsitaliamut ilaasortanngortitaammat. Nunatsinni Ilisimatusarnermut Siunnersuisoqatigiit nunarput sinnerlugu sumulluunniit attuumassuteqanngitsumik ingerlanneqartuuvoq. Sulissutigisarpaallu nunatsinni ilisimatusarnerup siuarsarneqarlunilu nukittorsarneqarnissaa kalaallinut inuiaqatigiinnut iluaqutaasussamik.
Lene Kielsen Holm ukiuni qulikkaani arlalinni nunat killeqarfii akimorlugit suleqatigiilluni ilisimatusarnermik ilusileeqataasimavoq, sumiiffimmi ilisimasat ilisimatusarnermi periuserineqartunut ilanngunneqartarlutik. Lene’p ineriartortitseqataaffigisimavaa ”ilisimasanik kattussuineq”, ilisimatuussutsikkut ingerlatallit sumiiffinni atuisunik ilisimasalinnillu naligiimmik suleqatigiittunik ingerlatseqataanermigut.
Lene Kielsen Holm 2012-miilli Pinngortitaleriffimmi ilisimatuusarluni ingerlatanik suliaqartarsimavoq 2018-milu januaarip aallaqqaataaniit Pinngortitaleriffimmi SPI-mi atorfinissimalluni.
Lene Kielsen Holm,ukiut ingerlanerini arlalinnik nersornaatisisimavoq, ilaatigut Namminersorlutik Oqartussat Avatangiisinut tunngasumik siullersaalluni akissarsitinneqarsimavoq 2007-imi, 2008-milu amerikamiut nersornaataat Wings World Quest Award pissarsiarisimavaa, arnanut ilisimatusartunut siuttunullu tunniunneqartartoq. 2018-milu Lene Kielsen Holm suleqataalu suliartik ”The Meaning of Ice” pillugu norsket nersornaataannik Mohn Prize immikkuullarissumik siuttuusimanertik pillugu nersornaatisinneqarsimapput.
Ukunanittaaq paasisaqarsinnaavutit:
Naalakkersuisut/ Government of Greenland
