Meeqqanut Saligaatsoq Saqqummersinneqarfia 13.06.2019

”Eqqakkat pinngortitamiitsinnginnissaat pingaaruteqarpoq”

Tassa ullormi pisup Meeqqanut Saligaatsup tamanna oqariartuutigaa. Meeqqerivimmiut atuartullu Nuummi katersortarfimmut qaaqquneqarput, tassanilu mingutsitsineq eqqakkanillu pinngortitamut qimatsiinnartannginnissaq ilikkagaqarfigaat.

• Pinngortitaq paarilluassagipput eqqagassallu uninngatsiinnarnagit iginneqartassasut oqariartuutigaarput, Paninnguaq Clasen, Pinngortitamut Avatangiisinullu Naalakkersuisoqarfimmi pisortaq oqarpoq.

Pinngortitallu Paarsisuisa ilaat Ermu, Qaarsoq aamma Anori meeqqat ilassiartorlugit najuupput. Paarsisut meeqqanit, nuannaartorisaminnik naapitsillutik nuannaaqisunit, pakkutaarneqaqattaarlutillu assamminneqaqattaarput.

Pinngortitap Paarsisui – Naturens Superhelte paasititsiniaaneruvoq meeqqanit nuannarineqarluartoq, KNR-ikkut Facebookikkullu takuneqarsinnaasoq, Pinngortitamut Avatangiisinullu Naalakkersuisoqarfimmit ingerlanneqartoq. Paarsisullu pissaanitik assigiinngitsut atorlugit pinngortitaq paarivaat.

• Pinngortitap Paarsisui aqqutigalugit meeqqat mikineranniit ingerlatitsivigerusuppagut. Qanga ilitsoqqussatsinnik pissusitoqqatsinnillu ilikkagaqarniassammata. Tassa pinngortitaq ataqqisassaasoq mingutsinneqassanngitsorlu, Paninnguaq Clasen, paasitsitsiniaanermi aqutsisuusortaaq oqarpoq.

Sammisassarpassuit

Pinngortitamut Avatangiisinullu Naalakkersuisoqarfiup erinarsortartoq inuusuttoq René Løvstrøm suleqatigaa, sammisaqartitsinermilu erinarsuut ”Nunannguaq”, pinngortitamut nunallu kusanaqisup paarilluarnissaanut tunngasoq, siullermeerluni appippaa.

Aaqqissuussamilu meeqqanut assigiinngitsunik sammisassaqartoqartitsisoqarpoq, eqqakkat mingutsitsinerlu pinnguarnikkut ilikkagaqarfigisinnaallutik. Ungasissutsinit assigiinngitsunit puiaasanik milorujussisaartoqarpoq, Nersussuaq Eqqaavissuarmioq Knora pillugu qalipaallaqqinneqqusaattoqarluni puussianillu plastikkinik aalisartoqarluni, taamaalillutik meeqqat Pinngortitap Paarsisuinut tunngasunik assigiinngitsunik pinnataqarsinnaallutik.

Meeqqat ilaasa pinnguarnerit pinnatassallu nuannarigaaramikkit arlaleriarlutik pinnguaatinik misiliipput.

Aaqqissuussaq Saligaatsoq-mit Pinngortitamut Avatangiisinullu Naalakkersuisoqarfik suleqatigalugu aaqqissuunneqarpoq. Ullorsiortitsinermilu Kommuneqarfik Sermersooq Pinngortitaleriffiullu immikkoortua Silap Pissusianik Ilisimatusarfik peqataapput.