Nunatsinni tuttut peqqeqaat Saqqummersinneqarfia 04.09.2019

Nappaatit tuttut uumaannarnissaannut, kinguaassiorsinnaanerannut amerlassusaanullu sunniuteqarsinnaapput. Canadami Nunatsinnilu tuttut nappaalanersut paasiniarlugu misissuineq siulleq naammassivoq inernerilu saqqummersinneqarput. Tuttut nappaatigisinnaasaat arlallit tuttoqatigiiaani aqqaneq-marluusuni naammattuugassaanersut misissorneqarput. (Canadami tuttoqatigiiaat 10, Kalaallit Nunaanni 2).

Misissuinerit inerneri ilisimatusarnikkut saqqummersittakkami Plos One-imi allaaserineqarpoq, allaaserinnittut ilagaat Pinngortitaleriffimmi seniorforskeri Christine Cuyler. (Allaaserisaq uani atuarneqarsinnaavoq).

Canadami nunami sumiinneq naapertorlugu assigiinngissutsit annertoqaat. Nunatsinnili tuttut allaa-nerujussuarmik inissisimasut misissuinerup takutippaa. Tuttut nappaatigisartagaat arfineq-pingasuusut akornganni arfineq-marluk nunatsinni nappaatigineqannginnamik (Alphaherpesvirus, Pestivirus, Parainfluenzavirus type 3, Neospora caninium, Brucella suis biovar 4, Toxoplasma gondii, West Nile Virus, Bovine respiratory syncytical virus), taamaallaat nappaat ataaseq nunatsinni tuttuni naammattuugassaasimavoq. Immikkoortortaqarfimmi Akia-Maniitsoq’mi (piniarfiusinnaasoq 3-mi) tuttut ilaat alphaherpesvirus’imik nappaateqarsimapput. Kangerlussuaq-Sisimiut piniarfianni (piniariartarfik 2-mi) tuttut nappaataasinnaasut arfineq-pingasuusut arlaannaalluunniit nappaatigineqanngilaq.

Canadami tuttut ikileriarujussuarsimapput, ikilerujussuarnerannullu nappaatit peqqutaaqataassangatinneqarput, soorluttaaq inuit avatangiisillu sunneeqataasimasinnaallutik.

– Nunatsinni tuttut maannamut nappaatinik ulorianarsinnaasunik eqqugaannginnertik iluaqutigeqigaat, tuttunik ilisimatusartartoq Christine Cuyler isumaqarpoq.

Nassuiaatigaattaaq tuttut umimmaallu peqqissusaannik nakkutilliineq ingerlaannartussaasoq.

– Kalaallit Nunaanni nakkutilliilluaannarnikkut tuttunillu avataaneersunik eqqussuinissamut inerteqquteqaannarnikkut nappaatit tuttunut ulorianarsinnaasut ingalassimatinneqarsinnaapput. Taamaalillutalu tuttuutigut peqqissuutittuaannarsinnaallutigit, Christine Cuyler naggasiivoq.

Annerusumik paasisaqarniaraanni:
Annerusumik paasisaqarniaraanni attavigineqarsinnaapput Christine Cuyler. Email chris.cuyler@natur.gl imaluunniit oqarasuaat 48 23 23/36 12 00-mut sianernikkut.