Raajartarineqarsinnaasussat 2020-mi amerlanerulaarsinnaapput Saqqummersinneqarfia 14.11.2019
Kalaallit Nunaata kitaata imartaani 2020-mi raajat 110.000 tonsit aalisarneqarsinnaassapput. Biologit raajartassiissutigineqarsinnaasunik aappaagumut innersuussinerat taamaalilluni ukiormannamut innersuussutigisimasaanniit 5.000 tonsinik qaffanneqarput. Kalaallit Nunaanni Tunup imartaani 2020-mi raajartassiissutigineqarsinnaasut ukiormannamut innersuussutigineqartunit allannguuteqartinneqaratik 5.000 tonsiupput. Siunnersuineq Naalakkersuisunut tunniunneqareerpoq, taakkuuppullu Kalaallit Nunaata imartaani raajartassiissutit tonsit qassiutinnissaannik aalajangersaasartut.
Kalaallit Nunaata kitaata imartaaniittartut raajat piujuartitsiniarnermik tunngaveqarluni iluaqutigineqarput, aalaakkaasumik inissisimallutik peqarluarlunilu, tamanna ilisimatusartartut naatsorsuutaasa paasinarsisippaat. Taamaattoqarnera aamma biologit misissuisarnerinit inernerusunit, raajarniat nalunaarsuutaannit aammalu qarasaasiaq atorlugu naatsorsuusiani takuneqarsinnaapput. Taamaattorli Qeqertarsuup Tunuani raajaqassuseq 2019-ip ingerlanerani appariaateqarujussuarpoq, avataanili raajaqassuseq qaffariaateqarluni, taavanilu pissutsit taamaannerat kattukkaanni raajaqassuseq tamakkiisumik isigalugu aalaakkaasumik inissisimavoq.
Raajaqassuseq oqimaassusinngorlugu tamakkiisumik paasiniarneqartarpoq raajarniat nalunaarsuutaannik, paasissutissanik kalinnermi ataatsimi pisarisartakkanit, biologit misissuisarnerinit pisat annertussuserisartagaannit kiisalu saarulliit raajaqassutsimik mangiartuisussat amerlassuserisinnaasaannik tunngaveqartumik naatsorsuusiornertigut missiliorneqartarpoq. Naatsorsuusiornerit tunngavigalugit Atlantikup Avannaatungaani Aalisarnermik Kattuffik (NAFO) taannaavoq biologit siunnersuinerat aallaavigalugu Kalaallit Nunaata kitaata imartaanut raajartassiissutigineqarsinnaasunik, tassalu aappaagumut 110.000 tonsiusinnaanerinik innersuussisartuusoq.
Nunatta Kangiata imartaani raajaqassuseq appasittumiippoq, raajarniarnerillu imartami annikitsuinnarmi ingerlanneqartarput, pisaasartulli ukiuni kingulliunerusuni ikittuaraannaasarput. Pinngortitaleriffik umiarsuarmik misissuutaarukkamilu ukiut kingulliit marluk misissuisinnaasarsimanngilaq. Taamaammat siunnersuineq allannguuteqanngilaq.
Sukumiinerusumik paasisaqarniaraanni saaffigisassaq:
Aalisakkanut Qalerualinnullu Immikkoortortami aqutsisoq Helle Siegstad, oqarasuaat +299 583193 imal. attaveqaqatigiinnermut pisortaq Else Løvstrøm, oqarasuaat +299 361293
