Ullorsiortitsineq iluatsilluartoq Saqqummersinneqarfia 19.02.2019
Arfininngornermi ferbuarip 16-iani Silap Pissusianik Ilisimatusarfiup ukiunik qulinngortorsiornera, silap pissusia pillugu Katuami ullorsiortitsinertalik, aallartilluarpoq.
Ullormi pineqartoq imaannaanngikkaluartoq inuit ilaqutariillu alapernaallutik qiimallutillu aaqqissukkamut aggiapput. Ulloq nuannaffiuvoq, Hinnarik aamma Sila Elvis aliikkusersuisuullutik. Pulaartullu alakkarsinnaasaannik apeqquteqarfigisinnaasaannillu suliffeqarfiit nerriveqarrallutik. Suliffeqarfiit peqataasut ukuupput; Asiaq, GEUS, Naalakkersuisut, Issittumi sakkutooqarfik, Nunatta Katersugaasivia Allagaateqarfialu aamma Ilisimatusarfik.
Saqqummiisut assigiinngitsut 13-iupput, sorpassuit sammineqarlutik, kalaallit nerisassaataanni tappiorannartuniit arferit erinarsornerannut sermersuarnullu tunngasut. Meeqqallu kilisaammik aqutsilluni spillimik uumasunillu qummuattaniitsunik tinguarteqqasimapput. Aammattaarlu saqqummersitsinerit eqqarsalersitseqisut, Naja Rosing-Asvidip eqqakkanik eqqumiitsuliai aamma assilissat Many Strong Voicesimeersut pulaartunit alakkarneqarsinnaasimallutik.
Assit ilamerngi takukkit.
