Ittoqqortoormiut eqqaanni nannunik nalunaaqutsiinissaraluit taamaatinneqarput

Nunatta Kangiata avannaani nannunik nalunaaqutsiinissaraluit nualluussuarmik coronamik nappaalasoqalernerata kingunerisaanik eqqugaapput.

Nunarsuarmi nualluussuarmik coronamik nappaalasoqarnera Pinngortitaleriffimmut sunniuteqalerpoq, apriilimi ingerlatassaraluit taamaatinneqarmata.

Nannut nalunaaqutserneqartinnatik ilisimajunnaarsaammik aallaaneqaqqaartarput. Ass.: F. Ugarte.

– Nunatta kangiata avannaani nannunik nalunaaqutsiinissaraluit taamaalillutik taamaatinneqarput, miluumasunut immikkoortortaqarfimmi pisortaq Fernando Ugarte oqarpoq.

Nannunik nalunaaqutsiinerit biologinit, ataqatigiissaarisartumik, piniartut attaveqaqatigiutigalugit, USA-mit, Nuummit, Ittoqqortoormiuneersunillu inuttaqartarlutik suliarineqartarput, peqataasussalli nunaminniit aallarsinnaanngikkunik Island aqqusaarlugu Nerlerit inaannut timmisartorsinnaannginnamik ornitassaminnut anngussinnaanngillat.

Taamaattumik nannunik nalunaaqutsiinissat ukiup tullianut kinguartinneqarput, Fernando Ugarte naggasiilluni oqarpoq.

Nannut nalunaarsorneqaraangamik misissorneqartarput, takissusaat nalunaarsorneqarluni uuttortarneqartarlutillu. Ass.: F. Ugarte.

Itinerusumik paasisaqarniaraanni attavissaq:

Miluumasunut immikkoortortaqarfimmi pisortaq Fernando Ugarte. Mobil: 522401, Email: feug@natur.gl