Nuup Kangerlua pillugu atuakkiaq Saqqummersinneqarfia 15.10.2020
”Nuup Kangerlua – issittumi kangerlummik misissuineq” Silap Pissusianik Ilisimatusarfiup paasiuminartumik atuakkiamut kusanaqisumut taaguutaavoq. Nuup eqqaani kangerluk paasisaqarfigineruniaraanni atuagaq atuassallugu piukkunnarluinnartuuvoq.
Pinngortitaleriffimmi Silap Pissusianik Ilisimatusarfiup ukiut qulit ingerlanerini Nuup Kangerluani uumassuseqarneq misissugarisimavaat. Nuup Kangerlua taamaasilluni nunarsuatsinni issittumi kangerluit misissorneqarnerpaavattut inissisimalerpoq.
Ilisimatusartartut paasisaat taamaasilluni kikkunnit tamanit atuarneqarsinnaalerpoq. Allaaserinneriaaseq oqaatsillu tamanit paasiuminartut atorneqaramik.
”Atuakkap ilisimatusartarneq uummaarinnerulersippaa atuarneranilu ilisimatusartartut misissuinerannut peqataasutut misinnarsitillugu. Atuagarlu saqqummersinneqarsinnaasimammat nuannarutigeqaarput”, Silap Pissusianik Ilisimatusarfimmi pisortaagallartoq, Mie Sichlau Winding oqarpoq.
Nuup Kangerluani uumasoqatigiiaanut toqqammaviliisut uumassusillit isiinnarnik takuneqarsinnaanngitsut atuakkami paasisaqarfigisinnaavatit. Sermit kangerluup aalisagaqarneranut qanoq pingaaruteqartiginersut immallu sikuata kulstoffimik piiaanertigut qanoq pingaaruteqartiginera paasisaqarfigisinnaavatit. Kangerlummi saarulliit arferillu pillugit allaaserisat atuarsinnaavatit, inuillu amerlanerpaartaasa takorloorsinnaanngisaattulluunniit ilillutit imaani uumaneqarnera misigisaqarfigisutut misigisinnaavat.
Uumasoqatigiiaat pillugit pikkunaatsumik allattoqanngivippoq, sammisalli immikkoortut tamarmik allaaserineqarsimapput, immikkoortoq ataasiinnarluunniit kisiat atuaraanni pissarsiaqarluartutut misinnarluni. Ilisimatusartartut sulinerat malinnaaffigitillugu paasisat nutaat pissarsiarineqartarput ilisimatusartartullu suleriaasianik paasisaqarnarluni.
Silap Pissusianik Ilisimatusarfimmi ilisimatusartartut ilisimasaminnik kangerlummilu assigiinngitsuni sulinerminni ilisimasaminnik annertoorujussuarmik tunniussaqarsimapput, atuakkamillu allattuupput Århus Universitetianeersut Signe Høgslund aammalu Peter Bondo Christensen.
Kalaallit Nunaata kangerluini suut tamarmik sooq qanorlu taamak imminnut attuumassuteqartiginersut pillugit kikkunnulluunniit issittumi pinngortitamik soqutigisaqartunut paasititserusunneq siunertaralugu ”Nuup Kangerlua” atuakkatut saqqummersinneqarpoq.
”Atuagaq aqqutigalugu Kalaallit Nunaata eqqaani uumassusillit ataqatigiissusaasa misissorneqarnissaasa pingaaruteqarluinnarnerinut ilisimannittoqalernissaanut aqqutissiuusseqataasimassalluta neriuutigaarput. Minnerunngitsumillu Kalaallit Nunaanni kangerlunni suut tamarmik qanoq ataqatigiitsigineri pillugit atuagaq aqqutigalugu inuusuttut soqutiginnilersissallugit neriuppugut, immaqalu kalaallinik ilisimatusartartoqalernissaanut pilerisaaqataasimassalluta neriuutigaarput”, Signe Høgslund atuakkioqataasoq oqarpoq.
Atuagarlumi kalaallisut, qallunaatut, tuluttullu saqqummersinneqartoq Nuummi Atuagkat-ni, Brugsenimi, Katersugaasivimmilu pisiassaavoq. Qallunaat Nunaanni atugaarniarfinni aalajangersimasuni atuagaq pisiassaavoq aammali Saxo aqqutigalugu pisiarineqarsinnaalluni.
Itinerusumik paasisaqarniaraanni attavissat:
Mie Sichlau Winding, Silap Pissusianik Ilisimatusarfimmi pisortaagallartoq; Oqarasuaat +299 361200; mail: miwi@natur.gl
Peter Bondo Christensen, Qaffasinnerusumik ilisimatusartartoq Aarhus Universitet; Oqarasuaat: +45 2261 7949; mail: pbc@bios.au.dk
Marie Jensby, Ussassaarillunilu attaveqaataasoq saqqummersitsisarfimmi TURBINE Forlaget; Oqarasuaat: +45 6054 8469; mail: marie.jensby@turbine.dk
